Kópbalaly otbasynan shyqqan balalar Qazaq Ulttyq qyzdar pedagogikalyq ýniversitetinde júz paiyzdyq jeńildikpen bilim alatyn bolady. Bul týraly oqý ornynyń Baspasóz qyzmetiniń jetekshisi Jandar Asan habarlady.
Onyń aitýynsha, Jastar jyly qarsańynda qolǵa alynǵan igilikti is Qyzdar ýniversiteti men «Nur Otan» partiiasy arasynda jasalǵan ózara yntymaqtastyq memorandýmy aiasynda júzege asyp otyr. Sonymen qatar Almaty qalasynyń ákimdigi de bastamaǵa qoldaý bildirdi.
Oqý jeńildigi kópbalaly otbasynan shyqqan, mektepte oqý úlgerimi jaqsy, halyqaralyq jáne respýblikalyq pán olimpiadalarynyń jeńimpazdaryna beriledi.
«Búginde 3 mektep oqýshysyna Qazaq Ulttyq qyzdar pedagogikalyq ýniversitetinde oqý grantyn alýǵa quqyq beretin arnaiy sertifikat tabystaldy. Endi olar bilim men ǵylymnyń qarashańyraǵynda bilim alatyn bolady», – deidi Jandar Asan.
Sonymen qatar «Nur Otan» partiiasynyń 2030 jylǵa deiingi baǵdarlamasynyń «Árbir adam úshin qoljetimdi bolashaq bilimi» atty ekinshi maqsatynda Qazaqstannyń árbir mektebinde IT-synyptaryn ashý, irgeli ǵylymdy damytý úshin jaǵdai jasaý qajettigi, bilim berý júiesine úzdik mamandardy tartý jáne oqý protsesine tsifrlyq tehnologiialardy keńinen engizýdi júzege asyrý syndy máseleler kóterildi. Bul mindetti júzege asyrý baǵytynda Qyzdar ýniversitetinde birqatar jumystar qolǵa alynyp, júzege asyrylýda.
Atap aitqanda, oqý ornynyń jas ǵalymdary robototehnika boiynsha startap jobalar jasaidy. Ýniversitet bazasynda osy tarapta ǵylymi-zertteý jumystaryn júrgizýge baǵyttalǵan arnaiy sektsiialyq úiirmeler qurý da kózdelip otyr. Onda ýniversitet ǵalymdary robototehnika boiynsha óńirdegi joǵary oqý oryndarynyń bilimgerleri men mektep oqýshylaryn zamanaýi zerthanalyq jumystarǵa tartyp, olardyń ǵylymi áleýetin kótermek. Maqsat – jastardyń robototehnika boiynsha ǵylymi-tehnikalyq shyǵarmashylyq qabiletin damytý. Buǵan ýniversitettiń materialdyq-tehnikalyq bazasy tolyq múmkindik beredi. Fizika-matematika fakýltetiniń janyndaǵy «Robototehnika» zerthanasy Lego, Arduino jáne Raspberry robottarymen, oqý-ádistemelik jáne baǵdarlamalyq nusqaýlyqtarmen jabdyqtalǵan.
«Nur Otannyń» «Rýhani jańǵyrý» sheńberindegi jobalarynan kitaphanalar da tys qalǵan joq, kitaphana qoryn tsifrlandyrýdy qolǵa aldy. Bul tarapta da oqý ornynyń Ǵylymi kitaphanasynda birqatar jumystar júielenip, ádebietter tsifrlyq formatqa kóshirilip jatyr.
