Eńbek jáne halyqty áleýmettik qorǵaý ministri Birjan Nurymbetov jańa járdemaqy tólene bastaǵanyn málimdedi, – dep habarlaidy Sputnik Qazaqstan.
"Biylǵy negizgi ózgeristerdiń biri - kópbalaly januialarǵa bólek járdemaqy engizilýi. Sebebi bizdiń ataýly áleýmettik kómekti alyp júrgen otbasylardyń basym bóligi – kópbalaly januialar. Sondyqtan olar úshin ataýly áleýmettik kómektiń bir bóligin bólek járdemaqy retinde shyǵarǵandy jón kórdik" dedi Nurymbetov astanada ótken baspasóz máslihatynda.
Ministrdiń aitýynsha, jańa járdemaqynyń basty ereksheligi sol, ol tabysyna qaramastan tólenedi. Járdemaqy bala sanyna qarai ai saiyn beriledi. Biyl osy járdemaqyǵa respýblikalyq biýdjetten 177 milliard teńge qarastyrylǵan.
"Qańtar aiynda 367 myń kópbalaly januiaǵa osy járdemaqy taǵaiyndalyp, qazirgi kezde ol kisiler ózderiniń esepshottaryna járdemaqyny alyp jatyr" dep atap kórsetti Birjan Nurymbetov.
Jańa járdemaqyny tóleý tártibi:
4 balaǵa - 42 496 teńge;
5 balaǵa – 53 127 teńge;
6 balaǵa – 63 757 teńge;
7 jáne odan kóp balaǵa – 74 388 teńge.
