Osy jyldyń sońyna deiin 12 myń kópbalaly otbasyn úimen qamtý kózdelýde. Bul týraly Úkimettiń baspasóz ortalyǵyndaǵy brifingte QR IIDM birinshi vitse-ministri Qaiyrbek Óskenbaev aityp berdi, dep habarlaidy "Ult aqparat".
«Elbasy kópbalaly jáne az qamtylǵan otbasylardy turǵyn úimen qamtý máselesin tapsyrǵan bolatyn. Sol sebepti, kerekti sharalardyń bári tolyq qabyldandy. Búgingi tańda Qazaqstanda 340 myńnan astam kópbalaly otbasy bar. Onyń ishinde kezekte turǵany - 31750. Tapsyrma berilip jatqan kezde 28 123 otbasy kezekte turǵan edi. Osy bir jarym aidyń ishinde 3 myńnan astam kópbalaly otbasy qosymsha kezekke tirkeldi. 2025 jylǵa deiin qarajat tolyq kózdelgenin ózderińiz bilesizder. 40 myńnan astam páter salamyz dep otyrmyz. Biyl jalǵa berilmeitin jáne satylmaityn 6 myń páterdi tapsyramyz. Ol jumys bastalyp ketti», - dedi vitse-ministr Elbasynyń «Áleýmettik qamqorlyq» sharalary boiynsha kópbalaly jáne az qamtylǵan otbasylardy turǵyn úimen qamtý mehanizmi jaily.
Qaiyrbek Óskenbaevtyń aitýyna qaraǵanda, 1 mamyrdan bastap kópbalaly otbasylarǵa baspana berilip jatyr.
«Osyǵan deiin 249 úi tapsyrylsa, keshe Óskemen jáne Semei qalalarynda taǵy qosymsha 10 páter tabystaldy. Osy aidyń kezegi boiynsha 1200-1300 páter tapsyrylady dep josparlap otyrmyz. Ár kún saiyn keste baqylanýda. Erteń, iaǵni 9 mamyrda BQO-da, Shymkentte, 15 mamyrda Atyraý oblysy men Almaty qalasynda kópbalaly otbasylarǵa úi tabystaý josparlanǵan», - deidi ol.
Vitse-ministr óz sózinde páterdi jekemenshikke satyp alamyz degen kópbalaly otbasylar bolsa, olarǵa bólek Turǵyn úi-jinaq banki arqyly taǵy da 6 myń páter qarastyrylǵanyn atap ótti.
«Qabyldanǵan sharalar boiynsha kópbalaly otbasylar bólek sanattarǵa jatqyzylyp, birinshi kezekte úimen qamtylýy kózdelgen. Sol jospar boiynsha «Nurly jer» baǵdarlamasyna tolyq ózgerister engizildi. Osy bastalǵan jumysty ai saiyn, kún saiyn qadaǵalap otyramyz. Negizi berilgen tapsyrma tolyqtai oryndalady. Búgingi kúni kezekte turǵan kópbalaly otbasylar Úkimet tarapynan 2025 jylǵa deiin úimen qamtylady. Sol sebepti ol úshin qobaljymasyn. Turǵyn úi jinaq banki arqyly 6 myń otbasy úi alatyn bolsa, biyl 12 myńnan astam otbasyny baspanamen qamtityn bolsaq, 3-4 jyl ishinde osy máseleni (kópbalaly otbasylardy úimen qamtý) sheshemiz dep otyrmyz», - deidi Qaiyrbek Óskenbaev.
Sondai-aq, ol kópbalaly analar qandai jaǵdaida baspanasynan aiyrylatynyn aitty.
Páterler satyp alý quqyǵymen de beriledi. Kópbalaly otbasylar satyp alý quqyǵynsyz jaldamaly páterlerde ómir boiy tura alady, degenmen olar baspanadan aiyrylyp qalmaý úshin jaldaý shartynyń barlyq talabyn oryndaýy kerek.
"Qandai jaǵdaida úiden shyǵarylady? Eger alty ai ishinde jalaqysy men kommýnaldyq tólemderdi tólemese, eger múlikti qasaqana búldirse jáne kórshiler shaǵymdansa, eger páter dúkenge nemese qonaqúige qaita jabdyqtalsa, eger otbasy páter alyp, baspanany jalǵa bergisi kelse, memleket buǵan jol bermeidi. Otbasy páter (basqa) alǵan jaǵdaida, ol kóshýi tiis", - dep túsindirdi Óskenbaev úkimettegi brifingte.
