Búgin Qazaqstan Respýblikasy Konstitýtsiiasynyń 25 jyldyǵyna arnalǵan «HHI ǵasyrdyń Konstitýtsiiasy - quqyq ústemdigi, adam qundylyǵy jáne memlekettiń tiimdiligi» taqyrybynda onlain-halyqaralyq konferentsiia óz jumysyn bastady, dep habarlaidy "Ult aqparat".
Aita keteiik, forým aiasynda Aziialyq Konstitýtsiialyq sottar men balama institýttar Qaýymdastyǵynyń IV Kongresi ótýde.
Konferentsiia jumysyna Qazaqstannyń memlekettik qurylymdarynyń basshylary, bedeldi halyqaralyq uiymdardyń, shet elderdiń konstitýtsiialyq baqylaý organdarynyń ókilderi, sondai-aq belgili quqyqtanýshy ǵalymdar qatysýda.
Halyqaralyq forýmdy Konstitýtsiialyq Keńestiń tóraǵasy Qairat Mámi ashty. Ol kez kelgen halyq úshin jalpyǵa birdei tanylǵan qundylyqtarǵa negizdelgen Konstitýtsiia turaqtylyq pen údemeli damýdyń kepili bolyp otyrǵanyn atap ótti.
Jalpy otyrysta Qazaqstan Respýblikasynyń Prezidenti Qasym-Jomart Toqaev quttyqtaý sóz sóiledi. Prezident 1995 jyly búkilhalyqtyq referendýmda Qazaqstannyń jańa Konstitýtsiiasy qabyldanǵanyn, Tuńǵysh Prezident Nursultan Nazarbaev Ata Zańymyzǵa ideialyq turǵydan bastamashy bolǵanyn, irgeli qujatty ázirleý jumysyn Elbasynyń ózi basqarǵanyn atap ótti.
«Konstitýtsiia Táýelsizdigimizdiń berik quqyqtyq negizin qalady. Adam jáne onyń ómiri, quqyqtary men bostandyqtary memlekettiń eń qymbat qazynasy dep jariialandy. Elimizdiń aýmaqtyq tutastyǵy, qoǵamdyq kelisim, saiasi turaqtylyq, quqyq ústemdigi jáne demokratiia qaǵidattary bas qujatymyzda aiqyn kórinis tapty. Konstitýtsiiada Qazaqstan Respýblikasynyń jańa memlekettiligin qalyptastyrý úshin asa mańyzdy quqyqtyq, saiasi jáne áleýmettik-ekonomikalyq alǵysharttar da aiqyndaldy», – dedi Memleket basshysy.
Sonymen qatar, halyqaralyq konferentsiia barysynda Q. Mámi Tuńǵysh Prezident-Elbasy Nursultan Nazarbaevtyń quttyqtaýyn jariialady. Elbasy Negizgi Zań álemdik órkeniet jetistikteri men qazaqstandyq qundylyqtardyń ádil jáne teńgerimdi úilesimin bekitti, memlekettik qurylym piramidasynyń negizine ainalǵanyn qadap aitty. Búkil qoǵamnyń igiligi úshin eldiń údemeli damý strategiiasyn tańdai otyryp, osy jyldar ishinde Konstitýtsiianyń talaby qatań saqtalýda. Tuńǵysh Prezident búgingi forým óte mańyzdy ekenin, osy oraida memleket pen halyqaralyq qoǵamdastyqtyń turaqty damýy maqsatyndaǵy ózekti máselelerdi talqylaýǵa múmkindik beretinin jetkizdi.
Budan bólek sharada sheteldik qonaqtar da sóz aldy. Olardyń arasynda Eýropa Keńesiniń quqyq arqyly demokratiia úshin Eýropalyq komissiianyń (Venetsiia komissiiasynyń) prezidenti Djanni Býkikkio, Eýraziialyq Ekonomikalyq odaq Sotynyń Tóraǵasy J. Báiishev, Germaniia halyqaralyq quqyqtyq yntymaqtastyq qorynyń Bas direktory Fraýke Bahler hanym jáne Nur-Sultandaǵy EQYU Baǵdarlamalar ofisiniń basshysy Derd Sabo da bar.
Konferentsiia baǵdarlamasy Konstitýtsiianyń quqyq ústemdigin qamtamasyz etýdegi, tsifrlyq transformatsiia dáýirindegi adam quqyqtary men demokratiialyq qundylyqtardy qorǵaýdaǵy róline, sondai-aq qazirgi zamanǵy jáne tiimdi memleketti jańǵyrtýdyń Konstitýtsiialyq qaǵidattaryna arnalǵan úsh sessiiadan turady.
Álemniń barlyq kontinentterindegi jetekshi zańgerler odan ári konstitýtsiialyq jáne quqyqtyq damýdyń ózekti máselelerin, sonyń ishinde koronavirýstyq indetke bailanysty máselelerdi talqylaýda.
Spikerler qatarynda Ázerbaijan, Aýǵanstan, Armeniia, Belarýs, Bolgariia, Germaniia, Grýziia, Úndistan, Indoneziia, Koreia, Qyrǵyzstan, Latviia, Malaiziia, Maldiv, Meksika, Mianma, Moldova, Mońǵoliia, Pákistan, Polsha, Resei, Tájikstan, Tailand, Túrkiia, Ózbekstan jáne Ýkraina konstitýtsiialyq ádilet organdarynyń basshylary bar.
Qatysýshylarǵa «Qazaqstan Respýblikasynyń Konstitýtsiiasy- memlekettiń turaqtylyǵy men órkendeýiniń negizi» tarihi-derekti onlain kórmesi uiymdastyryldy. Onda Negizgi Zań jobasyn ázirleý tarihyna jáne júrgizilgen konstitýtsiialyq reformalarǵa bailanysty biregei muraǵattyq qujattar qoiylǵan.
Budan buryn habarlanǵandai, Prezident Qasym-Jomart Toqaev «XXI ǵasyrdyń Konstitýtsiiasy – quqyq ústemdigi, adamnyń qundylyǵy jáne memlekettiń tiimdiligi» atty halyqaralyq ǵylymi-praktikalyq konferentsiianyń jáne Aziia konstitýtsiialyq sottary jáne balama institýttar qaýymdastyǵy IV Kongresiniń plenarlyq otyrysyna onlain rejimde qatysty.
