Altyn Orda órkenietiniń ortalyǵy bolǵan kóne Saraishyq qalasynyń aýmaǵynda Qasym hannyń eskertkishi ornatylýy múmkin. Ortalyq kommýnikatsiialar qyzmetinde ótken brifingide Atyraý oblysynyń ákimi Mahambet Dosmuhambetov osyndai málimet aitty, dep habarlaidy QazAqparat.
«Saraishyqta sapar ortalyǵynan basqa Altyn Orda tarihyna arnalǵan murajai salý josparda bar. Tarihshylar kóne qalada kerýen saraidan bólek qalqyma kópir bolǵan dep jazady. Sondai nysandardy uiymdastyryp, sol arqyly keletin týristerge tarihpen tanysatyndai jaǵdai jasaimyz. Ózimizdiń shamalaýymyzsha, bul joba jylyna 700 myńǵa deiin adam qabyldaýǵa múmkindik beredi. Birinshiden, sheteldik emes, ózimizdiń óńirlerden keletin jastardy, mektep jasyndaǵy balalardy sol jerge aparyp, tarihqa tanystyramyz», - degen ákim Qasym hannyń eskertkishin salý da josparda bar ekenin aitty.
«Sheshim qabyldansa, ortalyq memlekettik organdarmen, Úkimetpen birge sol jumystardy júrgizýge daiynbyz. Sondai usynys berdik. Ári qarai qoldaý kútip otyrmyz. Siz aityp otyrǵan Altyn Ordanyń 750 jyldyǵyna arnalǵan halyqaralyq konferentsiiada Qasym hannyń eskertkishin kóterý týraly usynys boldy. Ony da óte durys kórip otyrmyz. Eger Saraishyqta memorialdyq keshen bolǵanda ol jerde Qasym hannyń eskertkishi tursa, Saraishyq týrizmniń úlken bir ortalyǵyna ainalar edi», - dedi Mahambet Dosmuhambetov.
