Elimizge belgili «Kusto Group» halyqaralyq kompaniiasy Tótenshe jaǵdai kezinde Qazaqstan boiynsha kómekke muqtaj jandarǵa qol ushyn bergen edi. «Kusto Help» qaiyrymdylyq jobasy elimiz boiynsha 10 665 otbasyna, jalpy salmaǵy 266 tonna azyq-túlik kómegin taratty. Sonyń ishinde Jambyl aýdany boiynsha 200 otbasyna azyq-túlik sebetteri taratyldy.
Qaiyrymdylyq kerýenimen júrgen sol saparynda kompaniia basshysy Erkin Tátishev myrza aýdan ákimi Baǵdat Álievpen aqyldasa kelip, ár túrli ult ókilderinen quralǵan 9 bala asyrap otyrǵan Káribaevtar otbasyna 12 oryndyq miniven avtokóligin alyp berýdi uiǵarǵan edi.
1 maýsym – Halyqaralyq balalardy qorǵaý kúni merekesine orai atalmysh kompaniianyń direktory Erkin Tátishev myrza Jambyl aýdanyna arnaiy kelip, ýáde boiynsha Káribaevtar otbasyna avtokóliktiń kiltin tabystady.
Saltanatty sharaǵa aýdan ákimi Baǵdat Áliev, aýdandyq máslihattyń hatshysy Saiat Juryn, aýdan ákiminiń orynbasary Ádilbek Qambaruly, aýdandyq bilim bóliminiń basshysy Láilash Bákirova qatysty.
Baǵdat Baishaluly elimizdiń ár óńirinde qaiyrymdylyq jasap júrgen «Kusto Group» kompaniiasynyń basshylaryna alǵys aitty. Ol óz sózinde:
- Búgin belgili jýrnalist, kópbalaly ana Áliia Absámetova qaryndasymyzdyń otbasynda erekshe qýanyshty sát oryn aldy. Soǵys jyldaryndaǵy Áliianyń batyrlyǵy bir tóbe. Al búgingi zamannyń batyr Áliiasy – júregi meiirimge toly osy qaryndasymyz dep bilemin. Óitkeni, ol analyq qushaǵyna tek óziniń balalaryn ǵana emes, ózge ulttyń balalaryn da syiǵyza bildi. «Keń bolsań, kem bolmaisyń» degen osy bolar. Káribaevtar otbasyn kólikpen qamtamasyz etýi – oblys ákimi Amandyq Batalovtyń arnaiy tapsyrmalarynyń biri edi. Mineki, búgin sol tapsyrmanyń oryndalýyna Erkin baýyrymyz sebepker bolyp otyr. «Kusto Group» kompaniiasyna erekshe alǵysymdy aitamyn, - dedi.
Áliia Absametova da óziniń tolqyǵan kóńil-kúiin bylai jetkizdi: «Arman oryndalady. Tek oǵan jetý úshin shynaiy meiirimdilik, adal eńbek etý kerek. Mine, biz kópten beri armandaǵan avtokóliktiń kiltin «Kusto Group» kompaniiasy búgin tabystap otyr. Biz óte qýanyshtymyz. Ásirese, balalarymyz erekshe qýanyshqa bólendi. Bul kólik balalar merekesinde bizdiń otbasymyzǵa jasalǵan erekshe baǵaly syilyq boldy. Kompaniia ókilderine alǵysym sheksiz. Jumystaryna tabys tileimin», - dedi.
Qarǵaly aýylynyń turǵyndary, Káribaevtar otbasy tek Almaty oblysyna ǵana emes, búkil Qazaqstanǵa belgili. 2018 jyly "Mereili otbasy" óńirlik baiqaýyn jeńip, Qazaqstannyń 16 úzdik otbasy tizimine engen.
Baqtiiar AITALY
Jambyl aýdany
Almaty oblysy
