Qazaqstan Respýblikasynyń Mádeniet jáne sport ministri Arystanbek Muhamediuly elge keletin sheteldik tanymal ártisterdiń biýdjet aqshasynyń esebinen shaqyrylmaitynyn aitty, dep habarlaidy QazAqparat tilshisi.
«Astananyń 20 jyldyq mereitoiy aiasynda kóptegen shara ótkizilip, kópshiliktiń úlken qyzyǵýshylyǵyn týdyrdy. Bizdiń ministrliktiń basty saiasaty - eń birinshi kezekte óz ónerpazdarymyzy tanytý, kórsetý. Sheteldik ártister tek ózara tiimdi sharttarǵa sai shaqyrylady. Jaqynda bizden Sofiia Rotarýdy kim shaqyryp jatyr dep surady. Bizde joǵary deńgeidegi ártisterdi Qazaqstanda asa qomaqty aqshaǵa shaqyrý saiasaty joq», - dedi Arystanbek Muhamediuly Qazaqstan Respýblikasy Úkimetiniń baspasóz ortalyǵynda ótken brifing barysynda.
Ministrdiń aitýynsha, shetel ánshileri demeýshilerdiń qarajaty esebinen ǵana shaqyrylady.
«Biz EKSPO-2017 kórmesi aiasynda La Scala teatrynyń ártisterin shaqyrdyq. Biraq ol kezde 260 adam «Eni» kompaniia tobynyń arqasynda keldi. Plasido Domingo Rolex markaly saǵat kompaniiasynyń arqasynda óner kórsetti», - dedi ol.
