Almaty oblysyndaǵy Saty aýylynda «Kólsai kólderi» memlekettik ulttyq tabiǵi parkiniń damý tujyrymdasy qoǵam ókilderine tanystyryldy, dep habarlaidy ECO NEWS Telegram kanaly.
Tujyrymdama boiynsha parkte zamanaýi 3 vizit-ortalyq, glempingter, kempingter etno-aýyldar salyp, karavaningke arnalǵan oryndar daiyndaý kózdeledi. Bul rette týristik marshrýttar men soqpaqtardy damytýǵa basty nazar aýdarylady. Kúrdeli qurylys bolmaidy. Jeńil konstrýktsiialar qoldanylady.
«Kólsai-kólderi» memlekettik ulttyq tabiǵi parkiniń direktory Daniiar Turǵanbaev parktegi ekotýrizmge arnalǵan infraqurylym qorshaǵan ortaǵa ziian keltirmes úshin negizgi kólderden alys bolatynyn aitty.
«Qaiyńdy, Kólsai kólderine birde-bir nysan jaqyn salynbaidy. Ǵimarattardyń bári tómen ornalasady. Shatqaldyń ishine kirmeidi. Bul – tabiǵattyń suranysyn, qajettiligin eskerilip jasalǵan tujyrymdama. Kontseptsiianyń basty maqsaty – ekojúieni buzbaý. Adamdar jaiaý nemese velosipedpen júrip, tabiǵatqa ziian tigizbei demalatyn jaǵdaiǵa kelýimiz kerek. Taǵy bir maqsatymyz - eldimeken turǵyndaryn jumyspen qamtý. Tek iri biznes ókilderi emes, jergilikti halyq týrizmniń paidasyn kórýi tiis»- dedi ol jiynda.
Týrizmdi damytýdyń memlekettik baǵdarlamasyna sáikes, ekotýrizm jobalary da 2020 jyly nátijesin bere bastaýy tiis.
«Aldyn ala esepteýler boiynsha týristik marshrýttardyń sany artady, jergilikti turǵyndar úshin jańa jumys oryndary paida bolady, qonaq úi qory keńeiedi jáne shatyrlar men lagerler úshin kóbirek oryn bolady. Bul rette tabys jylyna 150 mln teńgege deiin ósedi», - dedi – «Kólsai Kólderi» Ulttyq memlekettik tabiǵi parkiniń Bas direktory Daniiar Turǵanbaev.
Aita keteiik, 2019 jyly «Kólsai kólderi» ulttyq parkine 87 myń týrist kelip, 30 mln teńge paida túsken.
Aldaǵy ýaqytta «Kólsai kólderi» ulttyq parkinde ekotýrizmdi damytý boiynsha qoǵamdyq keńes qurý josparlanyp otyr.
«Damý kontseptsiiasyn parktiń janynan qurylatyn Qoǵamdyq keńeske shyǵaramyz. Sol keńes jan-jaqty qarap, talqylap bolǵan soń ári qarai zańǵa sáikes áreket etemiz. Úlken investitsiialyq joba arqyly nysandar paida bolady. Tujyrymdany erteń biznes ókilderi investitsiialyq jobamen kelgende bizdiń talaptardy tolyq túsinsin dep jasap jatyrmyz. Baiqaýǵa qatysqan kásipker bizdiń tujyrymdamadaǵy ideia bolǵan jaǵdaida ǵana jumys isteýge múmkindik alady», - dep eskertti Ekologiia, geologiia jáne tabiǵi resýrstar vitse-ministri Erlan Nysanbaev.
Jiynǵa qatysqan týristik qaýymdastyqtar, ǵalymdar, sarapshylar jáne qoǵam qairatkerleri ulttyq parkti aralap, bolashaqta infraqurylym salynatyn oryndarmen tanysty. Úmitti investorlar óz jobalaryn kórsetti.
