Memlekettik kirister komiteti kólik quraldaryn satyp alý-satý kezinde kelisimshartta múliktiń naqty baǵasyn kórsetpeitin azamattarǵa eskertý jasady, dep habarlaidy ult.kz "Informbiýro" baǵdarlamasyna silteme jasap.
Vedomstvo málimetinshe, keibir azamattar salyq tólemeý úshin kóliktiń qunyn qujat júzinde birneshe myń teńgege deiin tómendetip rásimdeidi. Alaida mundai áreket keiin satyp alýshyǵa aitarlyqtai qarjylyq shyǵyn ákelýi múmkin.
Qoldanystaǵy zańnamaǵa sáikes, eger azamat kólikti satyp alǵannan keiin eki jyl ótpei qaita satsa jáne odan paida tapsa, tabystyń 10 paiyzy mólsherinde salyq tóleýge mindetti. Mysaly, avtokólik 10 million teńgege satyp alynyp, bir jyldan keiin 13 million teńgege satylsa, úsh million teńge kólemindegi tabystan 300 myń teńge salyq tólenedi.
Alaida keibir alypsatarlar bul talaptan jaltarý úshin kelisimshartta kóliktiń baǵasyn ádeii tómen kórsetedi. Máselen, qujatta kólik quny «1000 teńge» dep jazylýy múmkin. Mundai jaǵdaida keiin kólikti naryqtyq baǵamen satqan satyp alýshy úlken kólemdegi tabys tapqan bolyp eseptelip, qomaqty salyq tóleýge májbúr bolady.
Salyq sarapshysy Aidar Masatbaevtyń aitýynsha, azamat naqty paida kórmese de, kelisimsharttaǵy derekterge súiene otyryp salyq tóleýge mindettelýi yqtimal.
Óz kezeginde Almaty qalasy boiynsha Memlekettik kirister departamentiniń bas sarapshysy Qairat Túrimbetov baqylaý tetikteri kúsheitilip jatqanyn aitty. Onyń sózinshe, qarjylyq operatsiialardy tekserý barysynda mundai sáikessizdikter anyqtalýy múmkin.
Sondai-aq jańa Salyq kodeksine sáikes, múlikti satýdan túsken tabys 36 million teńgeden asqan jaǵdaida salyq mólsherlemesi 15 paiyzǵa deiin ósedi.
Osyǵan bailanysty Memlekettik kirister komiteti azamattarǵa kólik satyp alý-satý kezinde kelisimsharttaǵy baǵanyń shynaiy kórsetilýine erekshe nazar aýdarýǵa keńes berdi.
