Foto: ashyq derekkóz
Qazaqstanda kólik salasy turaqty ósim kórsetip otyr. 2025 jyldyń alǵashqy alty aiynyń qorytyndysy boiynsha elimizde kóliktiń barlyq túrimen 928 million jolaýshy tasymaldanǵan. Bul kórsetkish ótken jyldyń sáikes kezeńimen salystyrǵanda 10,5%-ǵa joǵary, dep habarlaidy Ult.kz.
Jolaýshylar tasymalynyń kóshin avtomobil kóligi bastap tur: avtobýstar, taksiler, trolleibýstar men marshrýttyq kólikter arqyly 911,1 million adam tasymaldanǵan. Bul 2024 jylmen salystyrǵanda 10,7%-ǵa artyq.
Áýe kóligimen qatynaǵan jolaýshylar sany da ósken. Alty ai ishinde 7,2 million jolaýshy ushqan — bul 6,1% ósim.
Temirjol kóligin 9,5 million jolaýshy paidalanǵan.
Júk tasymaly da aitarlyqtai artty: 2025 jyldyń alǵashqy jartysynda 550,8 million tonna júk tasymaldandy. Bul ótken jyldyń sáikes kezeńinen 10,9%-ǵa kóp. Negizinen astyq, kómir, qara jáne tústi metalldar, qurylys materialdary men munai ónimderi jetkizilgen.
Mamandardyń aitýynsha, bul ósim el ekonomikasyndaǵy jandaný men ishki suranystyń artýymen bailanysty. Kólik infraqurylymyna jasalyp jatqan investitsiialar da oń áserin tigizip otyr.
