Foto: depositphotos.com
Kólik prokýrorlary avtomobilderdi ákelýdiń «teris shemalaryn» anyqtady, - dep habarlaidy "Ult aqparat" Bas kólik prokýratýrasyna silteme jasap.
2023 jyldyń basynda Qazaqstanǵa 2022 jyldyń 1 qyrkúiegine deiin ákelingen sheteldik avtomobilderdi zańdastyrý bastaldy. Bul protsedýrany qaida jáne qandai qujattarmen ótkizýge bolatyndyǵy týraly egjei-tegjeili Nusqaýlyq birneshe ret kópshilikke jetkizildi. Alymnyń bir rettik mólsherlemesi 200 myń teńge kóleminde aiqyndaldy. Alaida, kólik prokýrorlary anyqtaǵandai, qaskúnemder bul jaǵdaidy Almaty qalasynda, BQO jáne ShQO-da paidalanǵan.
Vedomstvo málimetinshe, memleketke keltirilgen aldyn ala zalal 400 mln teńgeden astam. Basqa aimaqtarda tekserý jalǵasyp jatyr.
"Máselen, biyl 13 sáýirde osyndai josyqsyz azamattardyń biri jalǵan qujattardy, onyń ishinde Qyrǵyz Respýblikasynda kólik quralyn tirkeý týraly 2021 jylǵy kýálikti jáne satyp alý-satý shartyn usyna otyryp, shetelden ákelingen «Toyota Highlander» markaly mashinany qazaqstandyq esepke tirkegen.
Prokýrorlar olardyń naqtylyǵyna málimetterdi amerikandyq saittarmen salystyrý arqyly kóz jetkizdi. Bul atalǵan kóliktiń 2022 jyldyń 12 qazanynda «Copart» aýktsionynda satylǵanyn jáne 2023 jyldyń sáýirinde elge ákelingenin kórsetti.
Osy mán-jailardy jariia etýdiń negizgi sharttary men merzimderi týraly bile otyryp, jeke tulǵalardyń 2 mln teńgeden astam somaǵa memlekettik tólemderdi tóleýden jaltarǵan belgileriniń bar ekendigin tikelei kórsetedi" - delingen habarlamada.
Vedomstvo málimetinshe, tek Almaty qalasy boiynsha osyǵan uqsas 160 fakt anyqtalǵan.
"Kólik prokýrorlarymen memleketke keltirilgen zalaldy óteý jáne kináli adamdardy zańda belgilengen jaýapkershilikke tartý jóninde sharalar qabyldaý týraly másele qoiylyp, qadaǵalaý aktisi engizildi.
Sonymen birge, jinalǵan materialdar QR QK 195 jáne 361-baptary boiynsha is júrgizý sheshimin qabyldaý úshin qylmystyq qýdalaý organdaryna jiberildi" - delingen habarlamada.
