Foto: ©️ Tengrinews.kz / Turar Qazanǵapov
Kólik prokýratýrasy temir jol kóligimen jolaýshylardy tasymaldaý Qaǵidalaryna qatysty ministr buiryǵyna narazylyq keltirdi, - dep habarlaidy "Ult aqparat" quzyrly organnyń baspasóz qyzmetine silteme jasap.
Kólik prokýratýrasy josparly taldaý nátijeleri boiynsha Investitsiialar jáne damý ministriniń 2015 jyldyń 30 sáýirindegi "Temirjol kóligimen jolaýshylardy, bagajdy, júk-bagajdy jáne poshta jóneltilimderin tasymaldaý qaǵidalaryn bekitý týraly" buiryǵyna narazylyq keltirgen.
"Atalǵan Qaǵidalarǵa sáikes 15 jáne odan asqan balalar «QTJ «UK» AQ-nyń qyzmetterin zańdy ókilden notarialdy kýálandyrylǵan jazbasha kelisim men senimhat bolǵan jaǵdaida ǵana derbes paidalana alatyny anyqtaldy.
Bul norma Azamattyq kodekske jáne «Notariat týraly» Zańǵa sáikes «kelisimdi» kýálandyrý men «senimhat» berý óz aldyna bólek notariattyq is-áreket ekeni eskerilmegen.
Bul erejelerdi qoldaný monitoringi kórsetkendei, jolserikter Qaǵidalarǵa silteme jasap, bundai jolaýshylar saparǵa jiberilmei nemese olardy qozǵalys barysynda alynyp tastalynǵan jaǵdailar bolǵan.
Búgingi tańda Indýstriia jáne infraqurylymdyq damý ministrligi prokýratýranyń narazylyǵyn tolyq kólemde qanaǵattandyrdy jáne «QTJ «UK» AQ bir ǵana qujattyń (notarialdy kýálandyrylǵan kelisim) bolýy boiynsha osyndai qyzmetter kórsetý týraly nusqaý berdi" - delingen habarlamada.
Sonymen birge ýákiletti organ jolaýshylardy temir jol kóligimen tasymaldaý jónindegi Qaǵidalarǵa tiisti túzetýler engizý jáne jalpy ony jetildirý jumystaryn jalǵastyryp jatyr.
