Kólik politseileri osy jyldyń basynan beri elimizdiń áýe jáne temir jol kóligi nysandarynda 29 895 ákimshilik quqyq buzýshylyqty anyqtady, dep habarlaidy "Ult aqparat".
Kóliktegi politsiia departamentiniń bastyǵy Ońal Bekievtiń aitýynsha, 15 qyrkúiek kúni Pavlodar stansasynyń politsiia bólimi qyzmetkerleri «Semei-Nur-Sultan» baǵytyndaǵy jolaýshylar poiyzynan poiyz bastyǵynyń aktisine sáikes bir jolaýshyny túsirip alǵan.
«Mas bolǵan azamat poiyz jolseriginiń eskertýin elemei jolaýshylardyń mazasyn alǵan. Vagon tambýryna shyǵyp, zańsyz ári qajettilik bolmasa da stop-krandy tartyp qalyp, jolaýshylar poiyzyn toqtatqan. Kólik politseileri tekserý barysynda Semei qalasynyń 25 jastaǵy turǵynyn anyqtady. Meditsinalyq kýálandyrý qorytyndysyna sáikes, ol alkogolge «orta deńgeide» masań kúide bolǵan. Quqyq buzýshyǵa qatysty QR Ákimshilik quqyq buzýshylyq kodeksiniń 440-baby 3-tarmaǵy jáne 560-baby 1-tarmaǵy boiynsha eki ákimshilik hattama toltyryldy. Oǵan 13 890 teńge mólsherinde aiyppul salyndy», - dedi politsiia polkovnigi.
Kóliktegi politsiia departamenti baspasóz qyzmetiniń málimetinshe, temir jol qaýpi joǵary aimaq sanalady. Osyǵan orai departamenttiń politsiia bólimderine temir jol kóligi nysandarynda júrgen 1 344 jasóspirim jetkizilip, onyń 50-i Kámeletke tolmaǵandardy beiimdeý ortalyǵyna ornalastyrylǵan. Túnge ýaqytta eresekterdiń qaraýynsyz dalada júrgen jasóspirimder úshin 199 ata-ana QR Ákimshilik quqyq buzýshylyq kodeksiniń 442-baby 2 tarmaǵymen ákimshilik jaýapqa tartylǵan.
