«AMANAT» partiiasy janyndaǵy Kólik jáne logistika komitetiniń otyrysynda elimizdiń tranzittik qýatyn arttyrý jáne «Qazaqstan temir joly» Ulttyq kompaniiasy» AQ-nyń tranzittik-logistikalyq korporatsiia bolyp qaita qurylýy máseleleri talqylandy, dep habarlaidy "Ult aqparat" partiianyń baspasóz qyzmetine silteme jasap.
Otyrysty asha otyryp, Komitet tóraǵasy, Májilis depýtaty Samat Aqyshev Prezident Qasym-Jomart Toqaevtyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýy reformalar baǵytynyń sabaqtastyǵyn aiqyndaitynyna nazar aýdardy. Al ony iske asyrý – eldegi jeke biznestiń damýyna tyń serpin beredi.
«Joldaýda kólik máselesine qatysty aitylǵan tapsyrmalar qoǵam men jeke biznesti tarta otyryp oryndalýy tiis. Sol arqyly biznes óz damýyn josparlai alady. Salaǵa investitsiia quiady jáne ortaq jaýapkershilikti arqalaidy. Memleket basshysy aitqandai: «Biz bul múmkindikti tolyq paidalanyp, álemdik mańyzy bar kólik-tasymal torabyna ainalýymyz kerek», – dep atap ótti S.Aqyshev.
Indýstriia jáne infraqurylymdyq damý vitse-ministri Almaz Ydyrysov Komitet múshelerine Qazaqstannyń tranzittik qýatyn arttyrý boiynsha qabyldanyp jatqan sharalar týraly baiandady. Ol Transkaspii halyqaralyq kólik baǵdaryn damytý tranzittik jáne eksporttyq múmkindikterdi ártaraptandyrýǵa jaǵdai týǵyzatynyn atap ótti.
«Aldymyzda osy baǵyttyń ótkizý qabiletin 2025 jylǵa qarai 6 mln tonnadan 10 mln tonnaǵa deiin arttyrý mindeti tur. Atap aitqanda, Aqtaý portynda álemdik logistikalyq kompaniialardy tarta otyryp, «konteinerlik hab» salý josparlanýda. Sondai-aq, Kaspii teńizindegi parom flotynyń tapshylyǵyna bailanysty, 10 birlik óz paromymyzdyń qurylysyn bastaý josparlanýda. Buǵan qosa, jyljymaly temirjol sostavyn jańartý maqsatynda 2025 jylǵa deiin 1500 jartylai vagon, 3500 vagon platforma jáne 310 lokomotiv satyp alý josparlanyp otyr», – dedi vitse-ministr.
Óz kezeginde, «Qazaqstan temir joly» UK» AQ Basqarma tóraǵasynyń orynbasary Ánýar Ahmetjanov Eýropa men Aziia elderiniń turaqty saýda kólemi, teńiz tasymalynyń turaqsyzdyǵy men joǵary quny Qazaqstannyń kólik dálizderiniń qýatyn edáýir arttyratynyn atap ótti.
«Keiingi 5 jylda tranzittiń jyl saiynǵy ósimi orta eseppen 31%-dy qurady. Byltyr rekord ornady. Iaǵni, tranzit 1 mln JFE-den (konteinerlerden) asty. Bul nátijege Úkimet pen QTJ-nyń josparly jumysy arqyly qol jetkizildi. Tranzittik tasymaldardan túsetin kiris retteletin qatynastardaǵy shyǵyndardy jabýdy, jolaýshylar tasymalyn sýbsidiialaýdy, tarifterdiń ósýin tejeýdi qamtamasyz etedi», – dedi ol.
Bul rette, Samat Aqyshev, t/j tasymaldary naryǵyndaǵy negizgi oiynshy mártebesine qaramastan, salanyń básekege qabiletin arttyrý úshin «Qazaqstan temir joly» kólik jáne logistikalyq qyzmetter salasyna jeke kompaniialardy keńinen tartýǵa yqpal etýi tiis dep esepteidi.
«QTJ bir yńǵaily mehanizmdi pysyqtaýy qajet. Bul mehanizm QTJ-ǵa aýyrtpashylyq túsiretin mindetterdi oryndaýǵa biznesti yntalandyrý tiis. Ashyq jáne ádil oiyn erejelerin qalyptastyrý kerek. Túptep kelgende, júk tasymaly tarifiniń ár adamǵa qatysy bar», – dedi Komitet tóraǵasy.
Otyrys qorytyndysy boiynsha, Keńes beiindi ortalyq atqarýshy organ men «QTJ»-ǵa arnalǵan birqatar naqty usynymdar qabyldady. Atap aitqanda, Indýstriia jáne infraqurylymdyq damý ministrligi Básekelestikti qorǵaý jáne damytý agenttigimen jáne Bas kólik prokýratýrasymen birlesip, biznesti qorǵaý jáne jeke sektordy qoldaý jóninde tiimdi sharalar qabyldaý qajettigine nazar aýdardy.
