Bolat Ótemuratovtyń qory kóktemgi sý tasqynynan zardap shekken qazaqstandyqtarǵa aqshalai kómek beredi, dep habarlaidy "Ult aqparat".
Bul týraly qaiyrymdylyq qorynyń direktory Marat Aitmaǵambetov Ortalyq kommýnikatsiialar qyzmetindegi brifingte aityp berdi.
«Kómek kartasy» jobasy 2018 jyly bastalǵan. Bizdiń Qor kóktemgi sý tasqynynan, tehnogendi apattardan zardap shekken óńir turǵyndaryna qarajat bóledi. Munda Qyzyl jarty ai uiymy kómekke muqtajdardy anyqtaidy jáne Fortebank óz kartalary arqyly aqsha aýdarymyn qamtamasyz etedi. Árbir zardap shekken turǵynǵa 30 myń teńgeden beriledi. Árine, eń aldymen baspanasy qiraǵandar, jalǵyzbasty zeinetkerler, múgedekter, jalǵyzbasty analar, kópbalaly, az qamtylǵan januialar nazarǵa alynady», - dedi M. Aitmaǵambetov.
Onyń aitýynsha, tótenshe jaǵdaida gýmanitarlyq kómek kórsetetin uiymdar jeterlik. Olar azyq-túlikpen jáne qajetti kiim-keshektermen qamtamasyz etedi.
«Biz óz kezegimizde zardap shekkenderge aqshalai kómek kórsetýdi uiǵardyq. Bul qarjyǵa qajetti zattar, dári-dármek, qurylys materialdaryn alýǵa bolady. Gýmanitarlyq kómekti, júkti tasymaldaýdyń óz shyǵyndary bar. Al tikelei qarjylai kómek aýdarý óte tiimdi. Qarajatty Qazaqstannyń kez kelgen núktesine jyldam jiberýge bolady», - dedi qor direktory.
2018 jyly «Kómek kartasy» jobasy arqyly Shyǵys Qazaqstan obylsyndaǵy 863 otbasy 82 mln teńge kómek alǵan. 2019 jyly 114 mln teńge aqshalai kómek Qaraǵandy, Aqmola, Soltústik Qazaqstan, Almaty oblystary men Arys qalasyndaǵy 764 otbasyna kórsetilgen.
