Shyǵys Qazaqstan oblysynda qutqarýshylar sý tasqynynyń aldyn alý úshin qar jamylǵysyndaǵy ylǵal qoryn ólsheýde, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, qutqarýshylar men «Qazgidromet» RMK ShQOF mamandary birlesip, qar jamylǵysyndaǵy ylǵal qoryna monitoring júrgizýde. Bul maqsatta olar jol talǵamaityn tehnikamen Ertis ózeniniń sol jaǵalaýyndaǵy Óskemenge, Tavriia, Privolnoe jáne Kishi Qarasý aýyldaryna barǵan. Qardyń tyǵyzdyǵyn aiqyndaityn «VS-43» qurylǵysynyń kómegimen ólsheý jumystary júrgizildi.
«Óńir boiynsha tekserilgen aýmaqtardaǵy qar jamylǵysynyń deńgeii 50%-dy qurap otyr. Sondai-aq ólsheý jumystary Vostochnoe aýylynda júrgizildi. Munda qar jamylǵysy - 90%, ortasha biiktigi - 35 sm qurasa, qardaǵy sý qory - 126 mm-ge jetken. Privolnoe aýylynda qar jamylǵysy - 70%, biiktigi - 83 sm, sý qory - 241 mm. Shaǵyn jyralarda qar jinalýy baiqalady», - delingen habarlamada.
Óńirde aýa temperatýrasy kúrt jylynyp, jaýyn-shashyn kóp bolǵan jaǵdaida sý tasqyny qaýpi saqtalady.
