Kókshetaý pedagogikalyq kolledjiniń 1-kýrs stýdenti, qazaq tili baiqaýlarynyń jeńimpazy Viktoriia Kleptsova ózin asyrap alǵan ata-anasyna alǵys bildirdi, dep habarlaidy QazAqparat.
«Alǵys aitý kúni – beibitshilik pen kelisimniń kórinisine ainalǵan jarqyn mereke. Búgingi keremet merekede eń aldymen meni baýyryna basyp, aialaǵan, asyrap alýshy ata-anam – Sairan Qazybaiuly men Gúlnar Ámirjanqyzy Ybyraevtarǵa shyn júrekten alǵys aitamyn! Men úshin olar álemdegi eń qymbat, eń meiirimdi jandar», - dedi Viktoriia Kleptsova Táýelsizdiktiń 30 jyldyǵy men Alǵys aitý kúniniń 5 jyldyǵyna arnalǵan dóńgelek ústelde.
Sairan men Gúlnar Ybyraevtar Viktoriia men onyń eki baýyryn asyrap alǵan.
«Ata-anamnyń arqasynda meniń balalyq shaǵym baqyt pen qýanyshqa, umytylmas sátterge toly. Men ata-anamdy, ózimniń týǵanymdai bolǵan Bahtiiar, Aldiiar jáne Elaman aǵalarymdy qatty jaqsy kóremin, erekshe syilaimyn jáne árqashan maqtan tutamyn. Qazaq halqy ata zamannan jetimin jylatpaǵan el, árqashan bala tárbiesine erekshe mán bergen el. Osynyń ózi meniń basymnan ótken jaǵdaidyń taǵy bir dáleli dep oilaimyn. Álemdegi barlyq bala baqytty bolýǵa laiyqty. Elimizdegi árbir otbasyna yntymaq, dostyq, izgilik, syilastyq pen qurmet tileimin», - deidi Viktoriia Kleptsova.
Aita keteiik, 2016 jyldyń 14 qańtarynda Elbasy Nursultan Nazarbaev Jarlyqqa qol qoiyp, 1 naýryz - Alǵys aitý kúni dep jariialandy. Dál osy 1 naýryz kúni elimizde Qazaqstan halqy Assambleiasy qurylǵan bolatyn.
