Aqmola oblysynda bilim berý mekemelerinde adaldyq elshilerin sailaýǵa arnalǵan alǵashqy mobildi qosymsha tanystyryldy. «Tsifrlyq Qazaqstan» baǵdarlamasy aiasynda júzege asqan joba stýdentter úshin tiimdi bolmaq.
«Ambassadors of Integrity» mobildi qosymshasyn Kókshetaý Joǵary kolledjiniń stýdenti Maksim Sokolovskii jasap shyqqan.
Arnaiy uiymdastyrylǵan brifingte Maksim jasaǵan uialy qosymshany joba jetekshisi, Kókshetaý qalasy Joǵary kolledjiniń arnaiy pánder oqytýshysy Áset Ábdiǵaparov tanystyrdy.
«Maksim Sokolovskiidiń biregei jobasyn kópshilik nazaryna usynyp otyrmyz. Ótken jyly bizdiń kolledj oblystaǵy jalǵyz IT-ortalyq retinde tsifrlyq saýattylyqty tereńdetýge baǵyttalǵan óz jumystaryn bastady. Osy jyldyń naýryz aiynan bastap mobildik qosymshalardy damytýǵa qatysty jumys júrgizilip jatyr. Bul baǵdarlama bilim berý mekemelerinde adaldyq elshilerin sailaýdyń ashyqtyǵyn qamtamasyz etýge, sondai-aq stýdentterdiń jataqhanalardaǵy jai-kúiin anyqtaýǵa múmkindik beredi», - deidi Áset Ábdiǵaparov.
Brifingte «Aqmola - adaldyq alańy» jobasynyń múshesi Erlaz Jaiyqbaev qosymshanyń paida bolý tarihy men tiimdi tustary týraly aityp ótti.
Onyń aitýynsha, oqý oryndarynda parasattylyq printsipteri men adaldyq ustanymdaryna ishki baqylaý júrgizý maqsatynda «Adaldyq elshisi - Ambassador of Integrity» institýtyn qurý týraly usynys jasalǵan.
«Adaldyq elshisi» institýtyn engizý barysynda elshilerdi sailaý tártibiniń ashyqtyǵyn qamtamasyz etý máselesi týyndady. Sondyqtan, «Aqmola - adaldyq alańy» jobalyq ofisi arnaiy mobildi qosymsha jasaý bastamasyn kóterdi», - dep atap ótti Erlaz Jaiyqbaev.
Qazirgi tańda bilim berý mekemeleriniń qoldaýy nátijesinde, oblystaǵy 33 kolledjde adaldyq elshileri bólimi ashylyp úlgerdi. Stýdentter arasynda adaldyq elshilerin tańdaýdaǵy basty maqsat - stýdenttik ortadaǵy akademiialyq adaldyq pen tutastyq printsipterin ustaný ideiasyn júzege asyrý.
Mobildi qosymsha qazirgi ýaqytta túzetýler men tolyqtyrýlar kezeńinde tur. Sondai-aq, memlekettik tildegi nusqasy ázirlenýde. Jańa oqý kezeńi bastalǵanǵa deiin resmi túrde iske qosylady dep josparlanǵan.
