QR Premer-Ministri Álihan Smaiylov Aqmola oblysyna jumys sapary aiasynda birqatar mańyzdy ónerkásiptik jáne áleýmettik nysandardy aralap, óńirdiń densaýlyq saqtaý salasynyń damý barysymen tanysty, "Ult aqparat" primeminister.kz saityna silteme jasap.
Úkimet №2 «Kókshetaý Jylý» MKK aýdandyq qazandyǵynyń jumysyn tekserdi. Óndiristik qýaty shamamen 300 Gkal/saǵ qazandyq 1998 jyly paidalanýǵa berilgen.
Premer-Ministr jylytý maýsymynda Kókshetaýdyń jylý kózderinde tehnologiialyq buzýshylyqtar tirkelgenin atap ótti. Sondai-aq aýyz sýdyń sapasy boiynsha da problemalar boldy.
«Jylýmen qamtamasyz etý – Kókshetaý qalasy úshin mańyzdy máselelerdiń biri. JEO qurylysy boiynsha investitsiialyq jobany belsendi túrde ilgeriletip, konkýrstyq rásimder ótkizip, investordy jáne qarjylandyrý modelin aiqyndaý qajet. Jobany júzege asyrýǵa kóp ýaqyt ketedi, sondyqtan oblys aldynda qaladaǵy jylý kózderine sapaly jóndeý jumystaryn júrgizý mindeti tur», — dedi Álihan Smaiylov.
Energetika ministrligine ákimdikpen birlesip, áleýmettik mazýt satyp alý máselesin pysyqtaý tapsyryldy.
Sondai-aq Úkimet basshysy oblys ortalyǵyndaǵy sý tazartý qondyrǵylaryn rekonstrýktsiialaý jobasynyń 13 jyldan asa iske asyrylyp jatqanyna nazar aýdardy. Osy oraida Indýstriia jáne infraqurylymdyq damý ministrligine Qarjy ministrligimen jáne oblys ákimdigimen birlesip, jumystardy aiaqtaý úshin biýdjetten qarajat bólý múmkindigin pysyqtaý tapsyryldy.
Sonymen qatar Premer-Ministr jumys sapary aiasynda «Viamedis» JShS jańa klinikalyq-ońaltý ortalyǵynda boldy. Ortalyq bazasynda bir aýysymda 250 adamdy qabyldaityn emhana, statsionarlyq ońaltý bólimshesi, kúndizgi, hirýrgiialyq jáne terapiialyq statsionarlar jumys isteidi.
Álihan Smaiylov óńirdiń densaýlyq saqtaý salasynyń damýy týraly baiandamany tyńdady. Oblystaǵy jalpy ólim-jitim 10,3%-ǵa artqan. Ana ólimi, qan ainalymy júiesi aýrýlarynan bolatyn ólim-jitim boiynsha da jaǵdai osyndai.
«Ákimdik osy problemalardy sheshýge basa nazar aýdarýy kerek, sondai-aq densaýlyq saqtaý salasyna jas kadrlardy tartý jumysyn kúsheitýi qajet», — dedi Úkimet basshysy.
Premer-Ministr jumys sapary barysynda ártúrli polipropilen ydysyn shyǵaratyn «Novopek» JShS fabrikasyna da bardy. Kásiporyn zamanaýi jabdyqtarmen qamtamasyz etilgen. Óndiris tehnologiiasy boiynsha fabrika álemdik standarttardyń barlyq talaptaryna sai jáne polipropilen ydystaryn shyǵarý boiynsha BUU sertifikatyn alǵan. Kompaniianyń ónimderine ishki naryqta, sondai-aq Tájikstan, Ózbekstan jáne Resei Federatsiiasy elderinde suranys bar. Aldaǵy ýaqytta TMD-nyń basqa memleketterinde naryqqa shyǵý josparlanyp otyr.
Álihan Smaiylov Úkimettiń ekonomikany ártaraptandyrý, óndiriletin taýarlardyń nomenklatýrasyn keńeitý jáne kúrdelendirý, sondai-aq otandyq óndirýshilerdi shikizatpen qamtamasyz etý jumystaryn jalǵastyryp jatqanyn jetkizdi.
Odan ári Álihan Smaiylov «Gormolzavod» JShS kóptegen sút ónimderin daiyndaý, qaita óńdeý jáne satý jónindegi qyzmetimen tanysty.
«Aqmola oblysynda negizinen tamaq ónimderiniń óndirisi jaqsy damyǵan. Óńirdiń jetkilikti mólsherde mal azyǵyn daiyndaý múmkindigin eskere otyryp, sútti mal sharýashylyǵyn, sonyń ishinde sút óńdeý salasyn belsendi damytýǵa bolady», — dep atap ótti Premer-Ministr.
Sonymen qatar Álihan Smaiylov Úkimet ishki naryqta otandyq óndirýshilerdi yntalandyra otyryp, sút ónimderi importynyń kólemin maqsatty túrde qysqartýǵa basymdyq berip otyrǵanyn aitty.
«Bul úshin selektsiialyq jáne asyl tuqymdyq jumysty sýbsidiialaý jáne sút óndirisiniń qunyn arzandatý boiynsha memlekettik qoldaýdyń barlyq sharalary saqtalǵan. Oblys ákimdigi salalyq ministrlikpen birlesip, oblystaǵy sút óńdeý kásiporyndarynyń júktemesine erekshe nazar aýdarýy qajet», — dep tapsyrdy Premer-Ministr.
