Kókshetaýda J.Mýsin atyndaǵy joǵary kolledjinde latyn grafikasyna kóshýdiń negizgi aspektilerin talqylaý boiynsha «Latyn álipbii jáne jazý reformasy» atty dóńgelek ústel ótti.
Bul memlekettik tildi nasihattaýǵa arnalǵan shara Aqmola oblysy ishki saiasat basqarmasynyń memlekettik áleýmettik tapsyrysy aiasynda uiymdastyryldy.
Dóńgelek ústel jumysyna qazaq tilin latyn grafikasyna kóshirý máselesin túsindirý boiynsha Respýblikalyq jumys tobynyń quramyna engen Sh. Shaiahmetov atyndaǵy «Til-Qazyna» Ulttyq ǵylymi-praktikalyq ortalyǵynyń qyzmetkerleri, sondai-aq oblys ortalyǵynyń joǵary oqý oryndarynyń oqytýshylary men stýdentteri qatysty.
«Til-Qazyna» ulttyq ǵylymi-praktikalyq ortalyǵynyń qyzmetkeri Orazkúl Asanǵazynyń aitýynsha, qazaq tiliniń jańa álipbiine kóshý - qazirgi zamannyń talaby. Jahandaný dáýirinde latyn álipbiine kóshý álemdik aqparattyq keńistikke kirý úshin qajetti jáne ýaqtyly shara bolyp otyr. «Biz 2025 jyldan bastap álipbiimizdi latyn qarpine, álipbiine kóshirýge kirisýimiz kerek. Bul - ult bolyp sheshýge tiis printsipti másele. Bir kezde tarih bederinde biz mundai qadamdy jasaǵanbyz»,- degen Elbasy N.Á.Nazarbaevtyń «Qazaqstan-2050» Strategiiasy-qalyptasqan memlekettiń jańa saiasi baǵyty» atty Qazaqstan halqyna arnaǵan Joldaýyn tilge tiek etti.
Is-sharanyń sońynda Sh. Ýálihanov atyndaǵy Kókshetaý memlekettik ýniversiteti, Abai Myrzahmetov atyndaǵy Kókshetaý ýniversiteti, Kókshetaý tehnikalyq institýty jáne J. Mýsin atyndaǵy joǵary kolledj stýdentteri «Qazaqstan jastary bolashaq týraly» taqyrybyna latyn grafikasynda jazylǵan esse-baiqaýlaryna qatysqany úshin marapattaldy.
Qazaq álipbiin latyn grafikasyna kóshirý baǵytyndaǵy dóńgelek ústelder men seminarlar Tselinograd, Arshaly, Atbasar, Jaqsy, Esil, Jarqaiyń, Sandyqtaý, Zerendi, Býrabai, Birjan sal aýdandarynda jáne Stepnogorsk qalasynda ótkizildi.
