Kókshetaýda kópqabatty turǵyn úiden órt shyǵyp, 35 adam evakýatsiialandy, onyń ishinde 14 bala bar, dep habarlaidy QazAqparat.

Oblystyq TJD baspasóz qyzmetiniń málimetinshe, biylǵy jyldyń 26 qańtarda saǵat 22:10-da Kókshetaý qalasynyń «Tsentralnyi» shaǵynaýdanyndaǵy 5 qabatty turǵyn úide órt shyqqandyǵy týraly qońyraý shalynǵan. 

«Shaqyrý ornyna TJD jeke quramynan 20 adam jáne 4 arnaiy órt sóndirý tehnikasy jumyldyryldy. Órt sóndirýshiler arnaiy baspaldaqtyń kómegimen 35 adamdy evakýatsiialady, onyń ishinde 14 bala bar», - dedi TJD baspasóz qyzmetinen. 

Sonymen birge, Aqmola oblystyq PD baspasóz qyzmeti atap ótkendei, qutqarý jumystaryna Kókshetaý qalalyq PB-nyń «Ásker-5», «Ásker-8» jáne «Jaiaý patrýl - 882» patrýldik politsiia batalonynyń qyzmetkerleri tartyldy. Olar páter ishinde qalǵan múmkindigi shekteýli turǵyndy syrtqa alyp shyqty.