Kókshetaýda alǵash ret «Te-Art-Kókshe» halyqaralyq festivali bastaý aldy. 5 kúnge sozylatyn festival aiasynda Nur-Sultan, Almaty, Aqtaý, Aqtóbe, Taraz ben Semei qalalarynyń úzdik shyǵarmashylyq ujymdary óner kórsetedi. Munymen qosa, Resei men Ýkraina elderinen kelgen teatrlardyń spektaklderi de usynylady.
Halyqaralyq baiqaý oblys ortalyǵynda ornalasqan birneshe óner alańdarynda uiymdastyrylady. Oblystyq orys drama teatrynan bólek, Shahmet Qusaiynov atyndaǵy oblystyq qazaq mýzykalyq-drama teatry, Úkili Ybyrai atyndaǵy oblystyq filarmoniia, «Dostar» men «Kókshetaý» Mádeniet Sarailarynda festival qatysýshylary óz ónerlerin pash etpek. Keibir qoiylymdar atalmysh óner ordalarynda bir ýaqytta ótedi,-deidi festivaldiń ashylý saltanatynda sóz sóilegen uiymdastyrýshylar.
«Kez kelgen teatrlyq festivalge aýqymdy shara retinde qaraý kerek. Sebebi, jan-jaqtan teatr maitalmandary jinalady. Bizdiń Kókshetaý úshin bul aitýly oqiǵa. Mundai aýqymdy sharany ótkizýdi bizdiń barlyq oblys ortalyqtary armandaidy», - deidi Aqmola oblystyq orys drama teatrynyń direktory Beibit Bahtygereev.
Festivaldiń ádil qazylar arqasynyń quramynda ónertaný kandidaty, professor, teatr synshysy Sániia Qabdieva, Germaniia elinen kelgen teatrtanýshy ári synshy Nina Mazýr, grýziialyq teatrtanýshy, doktor Lasha Chhartishvili syndy synshylar bar. Olar ár akterdiń qoiylym barysyndaǵy kásibi sheberligine qarap, 4 nominatsiia, iaǵni, «Úzdik áiel róli», «Úzdik er adam róli», «Úzdik spektakl» men «Úzdik stsenarii» boiynsha baǵa beredi.
5 kúnge jalǵasatyn halyqaralyq festivalde barlyǵy 20-ǵa jýyq spektakl usynylady. Jergilikti ónerpazdar 2 qoiylym kórsetip, óńir namysyn qorǵamaq. Sonyń bireýi, Raqymjan Otarbaevtyń «Beibarys» shyǵarmasymen festivaldiń ashylý saltanatynda usynyldy. Al, festivaldiń sońy elordalyq teatrlardyń shyǵarmalarymen, iaǵni «Shyńǵys han» men «Áke» qoiylymdarymen jabylmaq.
