Foto: distfood.ru
Kókshetaýda dámhanada keshki as ishken 17 stýdent sýshiden ýlanyp qaldy. Aqmola oblysynyń sanitarlyq dárigerleri japon taǵamdaryn satyp alýda abai bolýǵa shaqyrady, dep habarlaidy QazAqparat.
Óńirdiń sanitarlyq-epidemiologiialyq baqylaý departamenti baspasóz qyzmetiniń málimetinshe, Kókshetaýda 2 kýrs stýdentteri arasynda jappai tamaqtan ýlaný deregi tirkelgen. Bul jaǵdaida dámhanada keshki as iship, sýshi jiyntyǵyna tapsyrys bergen 17 adam zardap shekti. Keiin keshki as ishkenderdiń barlyǵynda júrek ainý, qusý, diareia jáne dene temperatýrasynyń joǵarylaýy týraly birdei shaǵymdar boldy.
«Sanitarlyq qyzmet dámhanaǵa jospardan tys tekserý júrgizgen kezde aýrýdyń taralýyna yqpal etken sanitarlyq erejelerdiń óreskel buzylǵandyqtaryn anyqtady. Naqtyraq alsaq, tehnologiialyq úrdis saqtalmaǵany, ystyq sýmen jabdyqtalmaǵany, ydys - aiaqty sapasyz óńdelgeni, tamaq ónimderinde ishek taiaqshasy men stafilokokk tobynyń bakteriialary, óndiristik baqylaý baǵdarlamasynyń obektisinde bolmaýy, óndiristik baqylaý júrgizýge sharttyń bolmaýy, qyzmetkerlerde stafilokokk bary anyqtaldy. Sonymen birge, qyzmetkerleri meditsinalyq tekseristen ýaqytyly ótpegen», - dep túsindirdi vedomstvodan.
