Kókpardan kezekti Álem Chempionaty 2019 jyldyń qarasha aiynda ózbek elinde ótedi. Bul týraly Tashkentte bolǵan kókpar federatsiialarynyń halyqaralyq jiynynda aityldy.
Kongreske Qazaqstan, Ózbekstan, Tájikstan, Mońǵoliia, Qyrǵyzstan, Resei, Aýǵanstan, AQSh, jalpy jiyny segiz eldiń ókilderi atalmysh básekege qatysty oi-pikirlerin ortaǵa salyp, Kókpardan II Álem chempionatyna daiyndyq jumystaryn pysyqtady.
Jiynǵa qatysýshylardyń hattamaǵa túsken ortaq sheshimi boiynsha, jarystyń erejelerin naqtylaýǵa arnalǵan kezekti Kongress Astanada ótetin bolyp bekitildi.
Eske sala keteiik, 2017 jyly «EKSPO-2017» kórmesi aiasynda kókpardan tuńǵysh Álem chempionaty Túrki halyqtarynyń dástúrli sport túrleri halyqaralyq Qaýymdastyǵynyń uiymdastyrýymen Astana qalasynda ótken edi. Mártebeli jarysqa AQSh, Qyrǵyzstan, Ózbekstan, Túrkiia, Resei, Tájikstan, Qytai, Mońǵoliia, Aýǵanstan, Vengriia jáne óz elimizdiń kókparshylary qatysty.
Jalpy júlde qory 18 million teńgeni quraǵan I Álem chempionatynyń aqtyq synynda Qazaqstan qurama komandasy aiyr qalpaqty aǵaiyndardy 3:1 esebimen jeńip, Álem chempiony atanǵan edi.
