Qazaqstan óńirleri men qalalarynda qoǵamdyq monitoring salasynda baqylaý júrgizetin jumys toptary qurylady. Bul jóninde QR Densaýlyq saqtaý ministrligi men «Qoǵamdyq baqylaý jáne monitoring» respýblikalyq qoǵamdyq birlestigi arasynda qol qoiylǵan memorandýmda aitylǵan, dep habarlaidy "Ult aqparat".
Densaýlyq saqtaý ministri Aleksei Tsoi Almaty qalasyna sapary aiasynda Qoǵamdyq monitoring tobynyń jetekshisi Saida Taýkelovamen kezdesti. Júzdesýde Densaýlyq saqtaý ministrligi men «Qoǵamdyq baqylaý jáne monitoring» respýblikalyq qoǵamdyq birlestigi arasynda yntymaqtastyq týraly memorandýmǵa qol qoiyldy.
«Taraptar meditsinalyq uiym, onyń ishinde koronavirýs indetine jáne pnevmoniiaǵa qarsy kúreske tartylǵan statsionarlyq emdeý mekemeleri, dárihanalar men dárihanalyq kóterme saýda qoimalary, sondai-aq qaiyrymdylyq jáne gýmanitarlyq kómekti bóletin uiymdar qyzmetiniń tiimdiligin, ashyqtyǵyn arttyrý jónindegi maqsattardy iske asyrýda ózara is-qimyl jasaýǵa nietti.
Budan basqa, halyqty sybailas jemqorlyqqa qarsy is-qimyl protsesine tartý jáne azamattardyń memleket pen jergilikti basqarý organdarynyń qyzmetine senim arttyrý úshin qoǵamdyq múddelerdi qorǵaýǵa baǵyttalǵan azmattyq bastamalardy iske asyrý sheńberindegi yntymaqtastyq kózdelgen», - dedi Densaýlyq saqtaý vedomstvosynan.
QR Densaýlyq saqtaý ministrligi men «Qoǵamdyq baqylaý jáne monitoring» RQB densaýlyq saqtaý salasynda uzaq merzimdi áriptestik bailanysty damytýǵa yqpal etetin jaǵdai jasaýǵa, sondai-aq ornyqty jáne úilesimdi damý qaǵidattaryna sáikes qoǵamdaǵy oń ózgeristerge baǵyttalǵan jobalardy qalyptastyrý jáne qoldaý boiynsha praktikalyq qadamdardy júzege asyrýǵa kelisti.
Atap aitqanda, Qazaqstan óńirleri men qalalarynda gýmanitarlyq jáne áleýmettik mańyzy bar jobalardy birlesip iske asyrý, qoǵamdyq monitoring salasynda baqylaý júrgizetin jumys toptaryn qurý josparlanǵan.
A.Tsoi atap ótkendei, QR Densaýlyq saqtaý ministrligi meditsinalyq kómektiń sapasyn jaqsartý jáne dári-dármekpen úzdiksiz qamtamasyz etý maqsatynda osy jumys formatyn qoldaidy.
Eske salaiyq, búgin A.Tsoi Almatyǵa sapary barysynda qala ákimi Baqytjan Saǵyntaevpen jáne meditsina qyzmetkerlerimen kezdesti.
Ministr bastaǵan delegatsiia qalalyq №7 aýrýhanada boldy.
Odan keiin Aleksei Tsoi sanepidbaqylaý, medfarmbaqylaý aýmaqtyq departamentteri mamandarynyń qatysýymen KVI-men kúres jónindegi shtabtyń kóshpeli otyrysyn ótkizdi.
