Búgin Aqparat jáne qoǵamdyq damý ministri Aida Balaeva Almaty qalalyq Qoǵamdyq keńesiniń múshelerimen kezdesti, dep habarlaidy "Ult aqparat".
Kezdesý barysynda ministr qoǵamdyq keńesterdiń jumysy ministrlikpen únemi taldanyp jáne qoǵam belsendilerimen talqylanatyndyǵyn, al nátijeleri memlekettik organdar men azamattyq qoǵam institýttarynyń alańdarynda jariialanatyndyǵyn atap ótti.
«Qoǵamdyq keńester jumysynyń nátijesi retinde azamattyq qoǵamnyń pikirin bildirý maqsatynda naqty institýt quryldy.
Qoǵamdyq keńester «Halyq únine qulaq asatyn memleketti» qalyptastyrýdyń mańyzdy býynyna ainaldy», - dedi Balaeva.
Qazir Qazaqstanda 249 Qoǵamdyq keńes jumys isteidi, onyń ishinde 33-i respýblikalyq, 216-sy jergilikti deńgeide.
Ministr jyl basynda engizilgen Qoǵamdyq keńester qyzmeti boiynsha zańnamalyq ózgeristerdiń arqasynda Qoǵamdyq keńes jumysynyń tiimdiligin arttyrý isinde aitarlyqtai jetistikterge qol jetkizilgendigin atap ótti. Balaeva Qoǵamdyq keńesterdiń qyzmetin jetildirý jáne úilestirý boiynsha Ministrlik tarapynan júrgizilip jatqan jumysqa, onyń ishinde zańǵa táýeldi aktilerge, zańnamanyń negizgi erejelerin túsindirýge baǵyttalǵan ádistemelik seminar-treningter týraly egjei-tegjeili baiandap berdi.
Sondai-aq, ministr sarapshylar qaýymdastyǵymen birlesip, Qoǵamdyq keńester týraly ulttyq baiandama ázirlenip jatqanyn jetkizdi.
«Qoǵamdyq keńesterdiń halyqpen bailanys mehanizmderin kúsheitý úshin «KAZKENES» aqparattyq portalyn tanymal etý boiynsha jumys júrgizilýde», — dedi A.Balaeva.
Sonymen qatar, ministr kezdesý barysynda qoǵamdyq keńester óz ókilettikterin tolyq kólemde oryndamaitynyna nazar aýdardy.
Óz kezeginde Almaty qalalyq Qoǵamdyq keńesiniń músheleri qoǵamdyq keńesterdiń ókilettikterin keńeitý boiynsha zańnamalyq túzetýlerdiń is júzinde qalai júzege asyrylyp jatqanyn, keibir jergilikti atqarýshy organdarmen ózara is-qimyl boiynsha jumystaǵy qiyndyqtar týraly aityp berdi.
