Aqparat jáne qoǵamdyq damý ministriniń orynbasary Bolat Tilepov «Qoǵamdyq baqylaý týraly» Zańnyń artyqshylyqtaryn atady, - dep habarlaidy QazAqparat.
Vitse-ministr áýeli sybailas jemqorlyqty adamzat úshin qaýipti tórt qasirettiń biri retinde atady.
«Adamzat ómirine qaýip tóndiretin tórt úlken qasiret bar. Ol soǵys, ashtyq, indet jáne sybailas jemqorlyq. Sebebi sybailas jemqorlyqtan keletin zaýal tutas halyqtardyń, ulttyq qaýipsizdigine tikelei áser etedi. Árine, onymen kúres eń aldymen memlekettiń mindeti. Biraq bul kúrestiń nátijeliligi, birinshi kezekten, azamattyq qoǵamnyń jigerine, árbirimizdiń ishki mádenietimizge, jáne ustanymymyzǵa bailanysty. Sondyqtan bul jumys – azamattyq qoǵam salasyna quzyretti memlekettik organ retinde Aqparat jáne qoǵamdyq damý ministrliginiń eń mańyzdy mindetteriniń biri», - degen Bolat Tilepov jemqorlyqpen kúres boiynsha vedomstvo eki aýqymda baǵyt boiynsha júieli ister tyndyryp jatqanyn atady.
Ol, sondai-aq, ministrlik tarapynan Adaldyq alany jobalyq keńsesiniń jumysyn kúsheitýge kúsh salynatynyn atady.
«Qazirgi ýaqytta ministrlik Qoǵamdyq baqylaý týraly zań jobasyn daiyndap jatyr. Bul – jańa zań. Memlekettik organdardyń, kvazimemlekettik sektordyń qoǵam aldyndaǵy ashyqtyǵyn qamtamasyz etýge jol ashady. Onda qoǵamdyq baqylaýdy júzege asyrýshy sýbektiler tizimi anyqtalǵan. Qoǵamdyq baqylaýdy buryn úkimettik emes uiymdar men qoǵamdyq uiymdarǵa ǵana quqyq berilip kelse, qazir azamattar da osyndai quqyqqa ie. Iaǵni, azamattar da qoǵamdyq baqylaýdy júzege asyrýǵa quqyly. Zań áli de bolsa talqylaý ústinde. Eń bastysy, onyń ýaqtyly qabyldanýy», - dedi vitse-ministr.
