«Nur Otan» partiiasy Tóraǵasynyń Birinshi orynbasary Baýyrjan Baibek kópten beri partiia múshesi bolýdy armandap júrgen aqtaýlyq qoǵam belsendisi Baian Jalmaǵanbetovany arnaiy qabyldap, oǵan partiialyq biletin saltanatty túrde tapsyrdy.
Baian Jalmaǵanbetova elimizde múmkindigi shekteýli jandardyń múddesin qorǵap, áleýmettik jeliler men basqa da alańdarda osy máseleni jii kóterip júrgen belsendilerdiń biri. Ózi de taǵdyrdyń synaǵyna tap bolǵanymen, oǵan esh moiymai, alǵa umtylyp, igi isterimen tanylyp keledi. Aldaǵy ýaqytta osy baǵyttaǵy bastamalaryn «Nur Otan» partiiasymen birlesip júzege asyrýdy maqsat tutqan ol partiia múshesi bolýdy kópten beri kózdep júrgen.
Sondyqtan da ótken juma kúni Nur-Sultan qalasyndaǵy «Báiterek» monýmenti mańynda partiia Tóraǵasynyń Birinshi orynbasary Baýyrjan Baibekpen kezdeisoq kezdesip qalǵan kezde birden osy oiyn jetkizgen. Sol kezde partiia Tóraǵasynyń Birinshi orynbasary aldaǵy ýaqytta arnaiy kezdesip, partiiaǵa saltanatty túrde qabyldaitynyn aitqan edi.
– Sol kezde bergen ýádemizge bailanysty búgin ýaqyt bólip, ózińizben arnaiy kezdesip otyrmyz. «Nur Otan» partiiasy osydan 20 jyl buryn Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaev qurǵan elimizdegi jetekshi saiasi kúsh. Sol ýaqyttan beri partiia halqymyzdyń birligi men el irgesiniń beriktigin qamtamasyz etip keledi. Sondyqtan qatarymyzǵa ózińiz siiaqty elimizdiń erteńine bei-jai qaramaityn, naǵyz patriot azamattardy qabyldaimyz, – degen Baýyrjan Baibek qazirgi tańda partiia jumysyn qaita jandandyrý isi qarqyndy júrgizilip jatqanyn jáne aldaǵy ýaqyttaǵy baǵyt-baǵdaryn tilge tiek etti.
Sonymen qatar ol ómirde túrli qiyndyqtar men synaqtardyń bolatynyn, ondai kezde adam saǵy synbai, aldyna naqty maqsattar qoiyp, soǵan talpyný qajet ekenin aityp, Baian Jalmaǵanbetovanyń belsendiligi barsha qazaqstandyqtarǵa úlgi ekenin jetkizdi.
– Bizdiń partiia qiyndyqtarǵa qaramastan joldan jańylmai, arman-maqsatyna jetý jolynda aianbai eńbek etip kele jatqan siz siiaqty azamattardy qoldaidy. Bul – partiia Tóraǵasynyń tikelei tapsyrmasy. Sondyqtan biz sizdiń qatarymyzǵa qosylyp, partiia múshesi atanýyńyzdy zor qýanyshpen qabyldaimyz. Soǵan bailanysty búgin ózińizdi arnaiy qabyldap, partiialyq biletińizdi saltanatty jaǵdaida tapsyrýdy uiǵardyq, – dedi Baýyrjan Baibek.
Óz kezeginde Baian Jalmaǵanbetova partiia Tóraǵasynyń Birinshi orynbasaryna jeke qabyldap, zor qoshemet kórsetkeni úshin sheksiz alǵysyn bildirip, «Nur Otan» partiiasynyń múshesi atanǵanyna erekshe qýanyshty ekenin jetkizdi.
– Bul meniń kópten beri oilap júrgen armanym bolatyn. Óitkeni Elbasy partiiasynyń áleýmettik baǵyttaǵy bastamalardy tabysty júzege asyryp kele jatqanyn jáne múmkindigi shekteýli jandardy qoldaýǵa arnalǵan «Kedergisiz keleshek» jobasynyń bar ekenin jaqsy bilemin. Sondyqtan ózim osy partiianyń múshesi bolyp, elimizdegi múmkindigi shekteýli azamattardyń jaǵdaiyn jaqsartýǵa partiiamen birge óz úlesimdi qossam deimin, – dedi B.Jalmaǵanbetova.
Sondai-aq ol kezdesýde óziniń usynystaryna toqtalyp, keleshekte múmkindigi shekteýli balalardy ońaltý, oqytý jáne psihologiialyq qoldaý kórsetý ortalyǵyn ashqysy keletinin aitty.
Aita keteiik, Elbasy, partiia Tóraǵasy Nursultan Nazarbaev Qazaqstan halqyna arnaǵan Joldaýlarynyń birinde «Nur Otan» partiiasyna elimizdegi múmkindigi shekteýli azamattardyń ómir súrý sapasyn arttyrý jumystaryn qolǵa alýdy tapsyrǵan bolatyn. Sonyń barysynda kedergisiz orta qalyptastyryp, múmkindigi shekteýli azamattardyń kásipkerlikpen ainalysýyna jaǵdai jasaý máselesine erekshe basymdyq berdi. Osyǵan orai partiia 2014 jyldan beri «Kedergisiz keleshek» jobasyn júzege asyryp keledi. Joba aiasynda atalǵan azamattardy jumyspen qamtý, olardyń qoǵamdyq jáne áleýmettik ómirge belsendi aralasýyna jaǵdai jasaý, inkliýzivti bilim alý isin damytý, quqyqtarynyń qorǵalýyn qamtamasyz etý jáne taǵy da basqa ózekti máseleler oń sheshimin taýyp keledi.
Sonymen qatar qabyldaý barysynda osy salada belsendi eńbek etip júrgen azamat Jánibek Orynbasarovqa da partiialyq bileti saltanatty túrde tapsyryldy.
