Qazaqstan musylmandary dini basqarmasy «Zeket jáne qaiyrymdylyq» qory Ramazan aiynyń alǵashqy jumasynda «Ómirge úmit syila» aktsiiasyn ótkizdi, dep habarlaidy QazAqparat.
Igi shara Ramazan aiy men Táýelsizdiktiń 30 jyldyǵyna orai uiymdastyrylyp otyr. Dini basqarma Nur-Sultan qalasynyń №1 aýrýhanasyna meditsinalyq jabdyqtar men azyq-túlik sebetterin tabystady.
«Qadirli baýyrlar, qurmetti aq halatty abzal jandar! Eń birinshi sizderge óz atymyzdan, múftiiat atynan alǵys aitqymyz keledi. Indet álemdik deńgeide ýshyǵyp turǵanda sizder aldyńǵy qatarda júrdińizder, qazir de elge qyzmet etýdi jalǵastyryp júrsizder. Aldymen Alladan sizderdiń amandyqtaryńyzdy tileimin. Ýaǵyz-nasihatymyzda da halyqqa dárigerlerdiń eren eńbegin aityp jatyrmyz. Búgin múftiiat ujymymen birge Ramazannyń syilyǵyn berýge keldik. Bul – sizderge amalmen, ispen kórsetken rahmetimiz», - dedi QMDB Tóraǵasy, Bas múfti Naýryzbai qajy Taǵanuly.
QMDB biylǵy jyl basynda 7 baǵyttaǵy jumysqa basymdyq beretinin aitqan edi. Sonyń biri – qaiyrymdylyq baǵyty.
«Emhanada emdelip jatqan baýyrlarymyzǵa kómegimiz tisin degen maqsatta 3 ottegi kontsentraty apparatyn jáne 30 dana pýlsoksimetr, 30 dana tynys alýǵa jabdyǵyn tabystap otyrmyz. Al 150 dana azyq-túlik sebeti «Berekeli Ramazan syiy» aktsiiasymen aýrýhana qyzmetkerlerine beriledi. Buǵan deiin de qaiyrymdylyq sharalaryn jasap kelgen bolatynbyz, ári qarai da igi sharalardy jalǵastyramyz», - dedi Bas múfti.
Dini basqarmanyń habarlaýynsha, indet kezinde «Ómirge úmit syila» aktsiiasy aiasynda byltyrdan beri 67 aýrýhanaǵa 425 mln teńgeniń kómegi kórsetilgen. Onda ókpendi jasandy jeldetý apparattary, ottegi kontsentrattary, maska jáne qorǵanysh kiimderi berilgen.
