Foto: depositphotos.com
Qarjylyq monitoring agenttigi Qazaqstan aýmaǵynda onlain kazino qyzmetin júzege asyratyn uiymdardyń tizimin jariialady, dep habarlaidy "Ult aqparat" vedomstvonyń baspasóz qyzmetine silteme jasap.
Atalǵan tizim Memleket basshysynyń zańsyz qumar oiyndardy ótkizýdi shekteý týraly tapsyrmasyn oryndaý aiasynda Týrizm jáne sport ministrligimen birlesip qurylǵan.
Tizim qarjylyq monitoring sýbektileriniń zańsyz oiyn biznesine qarsy is-qimyl sheńberinde jáne óz qyzmetinde paidalanýy úshin QMA portalynda ornalastyrylǵan. Ol zańsyz oiyn biznesin júzege asyrý kezinde qarjy uiymdarynyń ónimderi men qyzmetterin paidalaný deńgeiin tómendetýge baǵyttalǵan.
"Oiynǵa táýeldilik adam taǵdyryn buzatyn qaýipti qubylysqa ainaldy. Bul problema otbasylyq, turmystyq zorlyq-zombylyqtyń týyndaýyna jáne basqa da qylmystyq quqyq buzýshylyqtar jasaýǵa alǵysharttar týǵyzady.
2019-2022 jyldar aralyǵynda 73 jasyryn kazino joiylyp, 2280 oiyn terminaly tárkilendi. Aǵymdaǵy jyldyń basynan beri Agenttik qyzmetkerleri 19 zańsyz oiyn mekemesin jáne 111 oiyn terminalyn anyqtady.
Qabyldanǵan aldyn alý sharalarynyń arqasynda sońǵy 5 jylda tirkelgen ister sanynyń 5,5 ese tómendeýi baiqalady" - delingen habarlamada.
Sonymen qatar, búgingi kúni Agenttik zańsyz oiyn qyzmeti (onlain kazino) belgileri bar áleýmettik jelilerdegi saittar men akkaýnttarǵa 3 myńnan astam siltemeni buǵattaǵan.
