Qazaqstan halqy Assambleiasynyń músheleri Arys qalasynyń turǵyndaryna kómek berý sharalaryn júieli jalǵastyryp keledi, dep habarlaidy Qazaqstan halqy Assambleiasynyń resmi saity.
Ondaǵy málimetterge qaraǵanda, búgin, 12 shildede Qazaqstan ózbekteri etnomádeni birlestikteri «Dostyq» qaýymdastyǵy qurylys materialdary tielgen 10 júk kóligin Shymkentten Arys qalasyna kómek retinde jóneltti. Quny 10 mln teńge bolatyn materialdar búgin apat bolǵan aimaqtaǵy Shymkent qalasyna bekitilgen №10 sektorǵa jetkiziledi.
«Qazaqstan halqy assambleiasynyń músheleri apat bolǵan alǵashqy sátten bastap arystyqtarǵa qoldan kelgen kómeginiń bárin kórsetti. Etnomádeni birlestikterdiń biri qarjylai, biri zattai jylý jinaýǵa úles qosty. Qazaqstandyqtardyń aýyzbirligi qandai qiyndyqqa da qarsy turýǵa bolatynyn tanytty. El ekenimizdi, biriksek bizden qýatty kúsh, bizden meiirimdi qaýym bolmaitynyn dáleldedi. Qazaqstan halqy Assambleiasy eldigimiz synǵa túsken qiyn kezeńde jalpy somasy 90 mln teńgeniń kómegin kórsetti», - dedi Qazaqstan ózbekteri etnomádeni birlestikteri «Dostyq» qaýymdastyǵynyń tóraǵasy tóraǵasy Ikram Hashimjanov.
Aita ketý kerek assambleia músheleriniń qaiyrym-kómegi munymen tolastamaidy. Arys qalasyn qaita qalpyna keltirý jumystaryna qol ushyn berip, qarjylai jáne materialdyq kómek kórsetý sharalary odan ári jalǵasýda.
