Nur-Sultan qalasynyń aýmaǵyndaǵy Kishi Taldykóldiń qustaryn basqa jaqqa jersindirý máselesi qarastyrylyp jatyr. Bul týraly Ortalyq kommýnikatsiialar qyzmetinde ótken brifingide QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar dúniesi komiteti tóraǵasynyń orynbasary Daniiar Turǵanbaev aitty, dep habarlaidy QazAqparat.
«Nur-Sultan turǵyndary №71 mektep mańyndaǵy kóldi kómip tastaǵanda ondaǵy qustardyń úilerge qarai qashyp, aqyry qyrylyp qalǵanyn aitady. Qazir ákimdik Kishi Taldykóldi de kómip jatyr. Biyl Taldykólge qoqiqazdar keldi. Budan bólek úirek pen aqqýdyń, basqa da qustardyń júrgenin kórdik. Kóldi osylai kóme berse, ondaǵy janýarlardyń jaǵdaiyna kim jaýapty? Qyrylsa, obaly kimde? Osy máseleni sheshý úshin qandai jumystar atqarylyp jatyr», - dep surady tilshi ministrlik ókilderinen.
Bul suraqqa Orman sharýashylyǵy jáne janýarlar dúniesi komiteti tóraǵasynyń orynbasary Daniiar Turǵanbaev jaýap berdi.
«Qazirgi ýaqytta bilikti mamandar, botanikter men zoologtar, ornitologtar bizdiń mamandarmen birlesip, osy máseleni jan-jaqty qarastyryp jatyr. Óitkeni arasynda jyl qustary bar. Ol qustardyń keletin ornyn aýystyryp, basqa jaqqa jersindireiik degen usynystar aitylyp jatyr. Ol usynystardyń bári zerttelýde. Naqty qorytyndysy boiynsha aqparatty keiin beremiz», - dedi vedomstvo ókili.
