Atyraýda kiiktiń múiizin Qazaqstannan Qytaiǵa satýmen ainalysqan uiymdasqan qylmystyq toptyń 12 múshesine qatysty sot úkimi shyqty. Topty basqarǵan - buryn QHR azamaty bolǵan qazaq, - dep habarlaidy "Aq Jaiyq" portaly.
Portal málimetinshe, qylmystyq top basshysy - Qytai azamaty, 38 jasta. Etnikalyq qazaq Sintszian-Uiǵyr avtonomiialyq aýdanyna qarasty Qulja aýylynda dúniege kelgen. Bala kezden Qytaida túrli kásippen ainalysyp, keiin Qyrǵyzstanda kókinis, kiim-keshek, mata, ydys-aiaq satqan. 2016 jyly alǵash ret Qazaqstanǵa kelip, aldymen Tarazda bolyp, keiin Almatyda biznes ashqysy kelgen, biraq joly bolmaǵan. Bir jyldan keiin ol Qytaiǵa qaita oralady. Sol kezde islam dinin berik ustanǵan adamdar qýdalanyp, solarmen birge onyń úsh aǵasy Sintsziandaǵy arnaiy túzeý lagerine qamalǵan. Bolmysy qazaq qytailyq azamat tańdaý jasap, 2018 jyly QR azamattyǵyn alady.
Osy jerde kásippen ainalysqysy kelgen, biraq onyń kóńili burynnan basqada bolǵan. 2018 jyly ol qylmystyq jolmen kásip bastap, óziniń týyp-ósken jerine kiiktiń múiizin satqan.
Sot talqylaýynda 2018 jyldyń jaz aiynan bastap 38 jastaǵy er adam kiik múiizderin shyǵys meditsinasymen ainalysatyndarǵa satý maqsatynda Qazaqstanda qylmystyq top quraǵany anyqtalǵan.
Aldymen topqa Almaty men Shymkent qalasynyń turǵyndary qosylyp, keiin qylmystyq toptyń quramy Oral, Atyraý, Almaty, Qyzylorda, Shyment, Qaraǵandy, Jezqazǵan turǵyndarymen tolyqty.
Shymkent qalasynyń turǵyny buryndary kiik múiizin satýmen ainylysyp júrgen adamdarmen bailanysty.
Jumys barysy mynadai: olar kiiktiń múiizin aitylǵan óńirlerden satyp alyp, poiyzben Almatyǵa jolserikter arqyly jiberip otyrǵan (olar qaptamada ne bar ekenin bilmeidi). Ol jerden baǵaly júk Qytaiǵa ótkiziledi.
"Bizdiń óńirdi aitar bolsaq: Atyraýda burynǵy Qytai azamatyna kiiktiń múiizin Qyzylqoǵa aýdanynyń úsh turǵyny, 36-jastaǵy Mahambet aýdanynyń turǵyny jáne Inder aýdanynyń 46-jastaǵy turǵyny satqan", - delingen materialda.
2019 jyldyń qazanynda qylmystyq topty Almaty, Aqtóbe jáne Atyraýdaǵy Ulttyq Qaýipsizdik qyzmetkerleri quryqtady. Jedel tergeý toby tintý júrgizgen kezde 1 tonna 118 keli kiiktiń múiizin tárkiledi. Qylmyskerler janýardy óltirip, múiizin kesip alyp, al etin dalaǵa tastaǵan.
Mamandar esebi boiynsha, qylmystyq toptyń zańsyz áreketinen memleketke 5 milliard 665 million teńge mólsherinde ziian kelgen. Tipti qylmystyq toptyń músheleri ustalǵan kezde top basshysy para berip, toqtatqysy kelgen eken. Alaida ol jospary iske aspaǵan.
Qylmystyq is Atyraý oblysynyń qylmystyq ister jónindegi mamandandyrylǵan aýdanaralyq sotynda qaralyp, sot 12 adamdy QR Qylmystyq kodeksiniń 262 jáne 339-babymen kánili dep tanyldy.
Uiymdasqan qylmystyq top basshysy 8 jyl bas bostandyǵynan aiyryldy. Eki adamǵa odan az berildi. Sottalýshynyń barlyǵy da qylmysyn moiyndamai, oblystyq sotqa apelliatsiialyq shaǵym túsirdi. Alaida sot úkimi ózgerissiz qaldy.
