Kievtegi Qazaqstan elshiligi qalypty rejimde jumys istep tur. Diplomattarymyz da qyzmetin jalǵastyra beredi. Bul týraly Syrtqy ister ministrliginiń resmi ókili Aibek Smadiiarov habarlady, dep jazady "Ult aqparat".
«Ýkrainadaǵy qazaqstandyqtardyń nazaryna qulaqqaǵys. Ondaǵy azamattar bizdiń elshilikke habarlasyp, ornalasqan jeri men ózderine qatysty málimet usynýy qajet jáne múmkindik bolsa, Kiev jáne Lvov qalasyna óz betimen barýlaryn suraimyz. Árine, eldegi áskeri áreketterge bailanysty jetý qiyndyq týdyrýy múmkin. Ondai jaǵdaida qazaqstandyqtar ornynda qalǵany durys. Elshilik janynan «jedel jeli» ashyldy, sonda habarlasyp, jaǵdaidy bile alady», - Aibek Smadiiarov ministrlikte ótken baspasóz máslihatynda.
Onyń aitýynsha, azamattardy elge qaitarý úshin barlyq jaǵdai jasalmaq.
«Kievtegi elshilik shtattyq rejimde jumys istep tur. Elshilikte 8 adam qyzmet atqarady. Keshe túnde elshilik ǵimaratynda 26 adam boldy. Onyń segizi - elshilik qyzmetkeri, on segizi - QR azamaty, altaýy - bala», - deidi ol.
Ol sondai-aq Ýkrainadaǵy qazaqstandyq diplomattardy evakýatsiialaý máselesin kóterdi.
"Diplomattardy evakýatsiialaý máselesi alǵashqy kúnnen bastap qoiylyp keledi. Olar birinshi bolyp evakýatsiialanatyn bolsa, basqa azamattardy qalai qutqaramyz? Esterińizde bolsa, Kabýlda da solai boldy. Iaǵni diplomattarymyz sońyna deiin jumys istep, azamattarymyzǵa barynsha kómek kórsetedi, sodan keiin olardy evakýatsiialaý máselesi týyndaidy", - dedi Smadiiarov.
