Foto: Massaget.kz
Almatyda hosteldegi órt kezinde qaza tapqan Qazaqstan azamattarynyń týystaryna 1 mln teńge kóleminde kómek beriledi. Bul týraly óńirlik kommýnikatsiialar qyzmeti brifinginde Almaly aýdanynyń ákimi Aidar Jaqybaev aitty, - dep habarlaidy Kazinform.
«Qala basshysy Erbolat Dosaevtyń tapsyrmasy boiynsha órt kezinde qaza tapqandardyń otbasylaryna 1 mln teńge kóleminde qarjylai kómek bólinedi. Buǵan deiin habarlanǵandai, Almaty ákiminiń tapsyrmasy boiynsha, ákimdik marqumdardyń denesi týystary kórsetken jerge, onyń ishinde elimizdiń basqa óńirlerine tasymaldaýǵa kómektesedi. Odan bólek, Almaty qalasy aýmaǵynda jerleý rásimin uiymdastyrýǵa tolyq kómek kórsetiledi», – dedi Aidar Jaqybaev.
Ol sondai-aq qaza tapqan sheteldik azamattardyń otbasylaryna da máiitti jerleý ornyna deiin tasymaldaýǵa járdem jasalatynyn aitty.
Eske salaiyq, búgin Almatyda hostel órtenip, 13 adam qaza tapty. Qalalyq tótenshe jaǵdailar departamentiniń málimetinshe, órt týraly habarlama 30 qarasha kúni saǵat 05:33-te túsken. Birinshi órt sóndirý bólimi shaqyrtý ornyna 7 minýt ishinde jetken.
Sonymen qatar órtten zardap shekken 2 adam qalalyq jedel shuǵyl kómek kórsetý aýrýhanasyna jatqyzyldy. Qalalyq densaýlyq saqtaý basqarmasynyń málimetine sáikes, naýqastyń birine kómirqyshqyl gazynan ýlaný diagnozy qoiyldy. Sondai-aq 59 adam evakýatsiialanyp, 56-sy jaqyn mańdaǵy mektepke ýaqytsha ornalastyryldy.
