Elordalyq «Barys» búgin Qaraǵandynyń «Saryarqa» komandasymen joldastyq kezdesý ótkizdi, dep habarlaidy "Ult aqparat". Atalǵan oiynda elordalyq klýb qarsylasynan 8:2 esebimen basym tústi.
Birinshi kezeńde esepti alǵash bolyp «Saryarqa» hokkeishisi Vladislav Kýliev ashty. Odan keiin «Barys» qatarynan segiz shaiba soqty. Birinshi kezeńde Anton Sagadeev 8, Álihan Ásetov 17-minýtta qaraǵandylyq komanda qaqpasynan sańylaý tapty.
Ekinshi kezeńde elordalyq klýb sapynan Linýs Videl 24, Egor Petýhov 33-minýttarda mergendik tanytty.
Al úshinshi kezeńde «Barys» qatarynan Dmitrii Gýrkov 51, Nikita Mihailis 53, Darren Dits 56, Dmitrii Shevchenko 58-minýttarda qarsylas klýbty qapy qaldyrdy. Qorytyndy esepti 60-minýtta «Saryarqa» sapynan Aleksandr Borisevich belgiledi.
Esterińizge sala ketelik, «Barys» budan buryn Óskemenniń «Torpedo» klýbymen eki márte joldastyq kezdesý ótkizdi. Alǵashqysynda 1:2 esebimen jeńilip, ekinshi oiynda 6:4 esebimen basym tústi. Al 31 tamyzǵa josparlanǵan Reseidiń «Avtomobilist» (Ekaterinbýrg) komandasymen joldastyq kezdesý ótkizilmeitin boldy.
Qurlyqtyq hokkei ligasyndaǵy alǵashqy oiynyn «Barys» 3 qyrkúiekte Latviiada «Dinamo» (Riga) komandasyna qarsy ótkizedi.
