Elimizde internet-alaiaqtyqqa qatysty qylmystardyń aldyn alýǵa jáne ashýǵa baǵyttalǵan «Hai-tek» operatsiiasy ótkizildi. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat.
«Ótken aptada aqparattandyrý jáne bailanys salasyndaǵy, sondai-aq aqparattyq tehnologiialardy, onyń ishinde internet-alaiaqtyǵyna qatysty qylmystardyń aldyn alýǵa jáne ashýǵa baǵyttalǵan «Hai-tek» operatsiiasy ótkizildi. Atalǵan is-sharanyń úsh kúni ishinde internet-paidalanýshylardy aldaýdyń kóptegen faktisi anyqtaldy», - dedi Nurdildá Oraz Ishki ister ministrliginde ótken baspasóz máslihaty barysynda.
Máselen, elordalyq politseiler azamattardy internet jelisinde joq páterdi jalǵa berý týraly habarlandyrý arqyly aldaǵan alaiaqty ustady. Jalpy somasy 300 myń teńgege materialdyq shyǵyn shekken 8 jábirlenýshi anyqtaldy. Sondai-aq ózgelerdiń derbes derekterin paidalana otyryp, mikroqarjy uiymdarynda onlain-kreditter rásimdeýmen ainalysqan Qostanai qalasynyń eki turǵyny qolǵa tústi. Jedel is-sharalar barysynda qosymsha 15 jábirlenýshi anyqtaldy. Keltirilgen zalaldyń jalpy somasy shamamen 2 mln teńgeni quraidy.
«Osyndai syzba arqyly Jarkent qalasynan kelgen eki alaiaq azamattardy aldady. Olar jyl basynan beri onlain-qaryzdar rásimdeý arqyly aqsha urlady. Materialdyq zalal 2 mln 470 myń teńgeni qurady. Almaty qalasynyń turǵyny «Olh.kz» saityna jalǵan habarlandyrýlar ornalastyryp, júk tasymaldaý qyzmetterin usyný arqyly aqsha tapaqshy bolǵan. Qazirdiń ózinde 1 mln teńgege jýyq somaǵa zardap shekken 6 jábirlenýshi anyqtaldy. Basqa aldanǵan adamdardy anyqtaý úshin is-sharalar qabyldanýda», - dedi ol.
Sonymen qatar resmi ókil Almaty qalasynda arnaiy tehnikalyq quraldardy zańsyz satqany úshin qala turǵyny ustalǵanyn aitty. Odan baqylaý satyp alý barysynda tyńdaý múmkindigi bar 3 GSM treker tárkilendi. Tekserý júrgizilýde. Jalpy, «Hai-tek» jedel aldyn alý is-sharalaryn ótkizý kezinde respýblika aýmaǵynda barlyǵy 214 quqyq buzýshylyq ashyldy. Olardyń basym bóligin internet-alaiaqtyq quraidy.
«Sondai-aq, Avtorlyq jáne sabaqtas quqyqtardy buzýdyń 2 faktisi, Internet jelisinde pornografiialyq materialdardy taratýdyń 8 faktisi jáne aqparattyq tehnologiialardy paidalana otyryp jasalǵan qylmystyq quqyq buzýshylyqtardyń ózge 14 faktisi tirkeldi. Barlyq materialdar boiynsha sotqa deiingi tergeý amaldary júrgizilýde», - dedi Nurdildá Oraz.
