Ádilet ministri Marat Beketaev Astana halyqaralyq qarjy ortalyǵynda qurylǵan Halyqaralyq tórelik ortalyǵyna 431 daýly is tirkelgenin málim etti, dep habarlaidy "Ult aqparat".
Dúniejúzilik bank pen Ádilet ministrligi «Daýlardy sheshý jáne aldyn-alý tetikterin jetildirý» taqyrybynda vebinar ótkizip jatyr. Atalmysh sharada sóz alǵan Ádilet ministri Marat Beketaev «Astana» qarjy ortalyǵy óńirdegi investitsiialyq daýlardy sheshýge belsendi atsalysyp otyrǵanyn atady.
«Qazaqstan otandyq jáne sheteldik investorlarǵa eń qolaily jaǵdai jasaýǵa daiyn. «Astana» halyqaralyq qarjy ortalyǵyn qurý – sonyń dáleli. AHQO-nyń jeke soty jáne halyqaralyq tórelik ortalyǵy bar. Bul organ aǵylshyn quqyǵynyń normalary men qaǵidattaryna negizdelgen Ortalyq Aziiadaǵy tuńǵysh júie ekenin aitý kerek. Iaǵni, azamattyq jáne kommertsiialyq daýlardy sheshý úshin eń joǵary halyqaralyq standarttar boiynsha jumys isteidi. Halyqaralyq tórelik ortalyǵy sot talqylaýlaryna táýelsiz, únemdi jáne jyldam balama usynady. Búgingde ortalyqqa tórelik jáne deldaldyq kómek suraǵan 431 is tirkelgen. Biz ozyq halyqaralyq tájiribe boiynsha quqyqtyq bazamyzdy jetildire túsemiz», - dedi Ádilet ministri.
Vebinarǵa Dúniejúzilik banktiń Qazaqstan boiynsha óńirlik menedjeri Jan Fransýa Marto, Dúniejúzilik banktiń vitse-prezidenti, Investitsiialyq daýlardy retteý jónindegi halyqaralyq ortalyqtyń bas hatshysy Meg Kinner, Halyqaralyq investitsiialyq jáne saýda quqyǵy professory Kai Hober-Ýpsala, Vena ýniversitetiniń Halyqaralyq jáne Eýropalyq quqyq professory Avgýst Reinish jáne basqa da sarapshylar qatysyp jatyr.
Marat Beketaevtyń sózine qaraǵanda, bul – Qazaqstandaǵy sot tóreligi sektoryn reformalaýǵa arnalǵan úshinshi vebinar.
«Búgingi sessiiada daýlardy sheshýdiń balama qyrlary talqylanady. Atap aitqanda, daýlardyń aldyn alý, tórelik jáne mediatsiia týraly sóz qozǵaimyz. Qazaqstan árqashan daýlardy sheshýdiń eń jaqsy tetikterin qalyptastyrýǵa jáne saqtaýǵa umtylyp keledi. 2016 jyly biz «Arbitraj týraly» Zań qabyldadyq. Zańnyń erejeleri 1985 jylǵy Halyqaralyq saýda tóreligi týraly úlgilik zańǵa, 1958 jyly Niý-Iorkte qabyldanǵan sheteldik tórelik sheshimderdi taný jáne oryndaý týraly konventsiiaǵa jáne 1961 jylǵy Halyqaralyq tórelik týraly Eýropalyq konventsiiaǵa sáikestendirildi», - dedi vedomstvo basshysy.
