Halyqaralyq olimpiadalar reitingi boiynsha beiresmi komandalyq jarysta Qazaqstan úzdik 30 eldiń qataryna engen. Bul týraly «Daryn» respýblikalyq ortalyǵy habarlady.
«Pandemiia búkil álemdegi bilim berý salasyna aitarlyqtai áser etti. Bilim berý mekemeleri, mektep oqýshylary men muǵalimder oqytýdyń jańa formatyna beiimdelýge májbúr boldy. Osy jolda Qazaqstan Respýblikasynyń Bilim jáne ǵylym ministrligine qarasty «Daryn» respýblikalyq ortalyǵy intellektýaldy is-sharalardy onlain rejimde qaita qurý boiynsha aýqymdy jumys júrgizdi. Mamandandyrylǵan bilim berý uiymdaryn qashyqtyqtan oqytý boiynsha ádistemelik usynymdar, sondai-aq mektep oqýshylarynyń olimpiadalarǵa jáne basqa da intellektýaldy jarystarǵa qatysý nusqaýlyqtaryn ázirledi», - dedi «Daryn» respýblikalyq ǵylymi-praktikalyq ortalyǵynyń direktory Aqjol Boranbai
Aqjol Boranbai «Daryn» ortalyǵynyń is-sharalaryna 1 millionnan astam bala tartylǵanyn aitady.
«Biyl bizdiń mektep oqýshylary halyqaralyq arenada 67 altyn, 125 kúmis jáne 195 qola medal jeńip aldy. Olardyń ishindegi eń bedeldi konkýrstardyń, mysaly, Himiiadan halyqaralyq olimpiada (IChO), Matematikadan halyqaralyq olimpiada (IMO), Fizikadan halyqaralyq olimpiada (IPhO), Biologiiadan halyqaralyq olimpiada (IBO), Informatikadan halyqaralyq olimpiadanyń (IOI) (ótpei qalǵan olimpiadalardan basqa) qorytyndysy boiynsha Qazaqstan beiresmi komandalyq jarysta úzdik otyzdyqqa kirdi», - deidi ortalyq basshysy.
Aqjol Boranbai pandemiia kezinde tsifrlandyrý salasy oqýshylardy, sonyń ishinde shalǵai aýyldardan kelgen balalardy intellektýaldy qyzmetpen kóbirek qamtýǵa múmkindik bergenin jetkizdi. Mysaly, biyl «Daryn» ortalyǵy olimpiadalarǵa daiyndalýǵa kómektesetin onlain-mektep ashqan. Onda 5-11 synyp oqýshylary úiden shyqpai-aq úzdik jattyqtyrýshylar men muǵalimderden bilim alady.
«Sabaqtarǵa 12 000-nan astam bala qatysty. Sonymen qatar, biz barlyq balalarǵa onlain olimpiadalar men intellektýaldy jarystarǵa qatysýǵa múmkindik berdik. Munda árkim óz bilimin úiden shyqpai-aq, kezeńdik irikteýden ótpei-aq teksere alady. Shyǵarmashyl balalar da óz talanttaryn onlain rejimde kórsete aldy, al erekshe bilim berý qajettiligi bar balalar úshin «Sheksiz ómir» baiqaýy ótkizildi», - dep tolyqtyrdy A.Boranbai.
