Halyqaralyq aqparattyq tehnologiialar ýniversitetiniń burynǵy rektory Damir Shynybekov sottaldy, dep habarlaidy "Ult aqparat".
№2 Bostandyq aýdandyq soty ýniversitettiń burynǵy rektory Damir Shynybekov pen burynǵy esepshi Janaiym Spabekovany bas bostandyǵynan aiyrý týraly úkim shyǵardy. Sýdia sottalýshylardyń árqaisysyn 8 jylǵa bas bostandyǵynan aiyrdy. Sonymen qatar, ekeýiniń de múlki tárkilenetin boldy.
Memlekettik aiyptaýshy rektor men burynǵy esepshisi Janaiym Spabekovany 8 jylǵa bas bostandyǵynan aiyrýdy suraǵan bolatyn.
Aita keteiik, oqý ornynyń burynǵy rektory Damir Shynybekov byltyr maýsym aiynda qamalǵan bolatyn. Sottalýshy D. Shynybekov pen J.Spabekovaǵa Qylmystyq kodekstiń 189-baby 2-bólimi 4-tarmaǵymen 1,7 mlrd teńge jymqyrdy degen aiyp taǵyldy.
Bas esepshi Janaiym Spabekova 2013-2018 jyldar aralyǵynda 414 mln 790 myń teńgeni jymqyrǵanyn moiyndady. 2017 jyly 128,2 mln teńge alǵan. Onyń aitýynsha, bul aqshaǵa Nur-Sultan qalasynyń Esil aýdanynan bir páter satyp alǵan. Almatyda «Arai» turǵyn úiinen parkingi bar 3 páter jáne Nissan Qashqai, Toyota Hilux kólikterin satyp alǵan. Qostanai oblysynda «Aigúl balabaqshasy» JShS, «Torǵai kópsalaly kolledji», «Torǵai jylyjaiy» jáne «Aralbai qaǵazy» kompaniialaryn satyp alǵan. Qostanai oblysy Torǵai aýylynda 3 úi, 1 jer ýchaskesin alǵan. Kompaniialar men jyljymaityn múlikter baýyry men balasynyń atyna jazylǵan. Biraq ekeýi de bul dúnie-múlik qandai aqshaǵa kelgenin aita almady.
Ýniversitet basshylyǵyna Damir Shynybekov 2009 jyly kelgen. 2017 jyly ol Almaty qalalyq máslihat depýtaty bolyp taǵaiyndaldy.
