QR Ulttyq ekonomika ministrliginiń Tabiǵi monopoliialardy retteý komiteti tóraǵasynyń mindetin atqarýshysy Ashat Japsarbai byltyrǵy tamyzdan beri tarifterdiń qalai ózgergeni týraly málimet berdi, dep habarlaidy "Ult aqparat".
Ortalyq kommýnikatsiialar qyzmetinde ótken brifingide BAQ ókilderi bir jylda komýnaldyq tarifterdiń qalai ózgergeni týraly surady.
«Jalpy Qazaqstan boiynsha 1200-den astam tabiǵi monopoliia sýbektisi bar. Árbir tabiǵi monopoliia sýbektisiniń 2-3 túrli tarifi bolady. Onyń bári ekonomikalyq jaǵynan saralanyp, qarastyrylady. Óńirler boiynsha aitsaq, mysaly sý burý, sýmen qamsyzdandyrý boiynsha tarif byltyrdan beri ósken joq. Kerisinshe keibir óńirlerde tarifter tústi. Sonymen qatar, jylý boiynsha tarfiter ózgergen joq. Tariftiń ósýine kóbinese strategiialyq taýarlardyń qymbattaýy áser etedi. Sondyqtan energiia óndirýshi uiymdardyń tarifiniń ósýi tabiǵi monopoliia sýbetilerine mýltiplikativti áser etip otyr», - dedi komitet tóraǵasynyń mindetin atqarýshy.
Sondai-aq, ol óńirlerdegi tabiǵi monopoliia sýbektilerinen tarifti kóterý týraly ótinishter túsip jatqanyn atady.
«Óńirler boiynsha tabiǵi monopoliia sýbektileri tarif kóterý týraly ótinish joldaǵan. Ol ótinish qaralyp jatyr. Biraq biz halyq úshin tarifti kótermeýge tyrysamyz. Bizdiń oiymyzsha, ol halyqqa kóp áser etpeidi. Byltyrǵy tótenshe jaǵdai kezindegi tariftiń túsýin eske alatyn bolsaq, tabiǵi monopoliia sýbektileriniń 80 paiyzdan astamy tarifti sol deńgeiden kótergen joq. Biz osy baǵytta jumysty jalǵastyryp jatyrmyz. Halyq úshin tarifter kúrt óspeidi. Biz ony mindetti túrde baqylaimyz», - dedi komitet basshysy.
