Azamattardyń halyq sanaǵy kezinde bergen derekterin qaýipsiz saqtaý úshin kriptografiialyq qorǵaý quraldary qoldanylady. Bul týraly Ulttyq statistika biýrosynyń basshysy Nurbolat Aidapkelov ortalyq kommýnikatsiialar qyzmetinde ótken brifingide málim etti, dep habarlaidy QazAqparat.
«Halyq sanaǵyn júrgizý kezinde jeke derekterdiń qaýipsizdigine kepildik beriledi. Azamattardan alynatyn barlyq aqparat qorǵalǵan bailanys arnalary arqyly biýronyń ortalyq serverine berilip otyrady. Ondaǵy aqparatty qorǵaý úshin Qazaqstan Respýblikasynyń standarty boiynsha aqparatty kriptografiialyq qorǵaý quraldary qoldanylady», - dedi biýro basshysy.
Al Sanag.gov.kz caityn qorǵaý úshin Sectigo SSL sertifikaty satyp alynǵan kórinedi.
«Onda paidalanýshy men server arasynda derekter almasý qorǵalǵan https hattamasy boiynsha júredi. Ulttyq statistika biýrosynyń barlyq aqparattyq júiesi aqparattyq-kommýnikatsiialyq infraqurylymnyń asa mańyzdy obektileri tizimine engizilgen jáne QR Ulttyq qaýipsizdik komitetiniń «Memlekettik tehnikalyq qyzmet» AQ monitoringine alynǵan. Sondai-aq, aqparattandyrý salasyndaǵy zańnama talaptaryna sáikes aqparattyq júieniń qaýipsizdik talaptaryna sáikestigine synaqtar júrgizildi jáne oń nátije alyndy», - dep naqtylady Nurbolat Aidapkelov.
Onyń aitýyna qaraǵanda, «Memlekettik tehnikalyq qyzmet» AQ sanaq boiynsha sanaq.gov.kz aqparattyq resýrstyń qol jetimdiligine táýlik boiy monitoring júrgizip, hakerlik shabýyldardyń aldyn alyp otyr.
«Alǵashqy statistikalyq derekterdiń saqtalýy men qupiialylyǵyn qamtamasyz etý QR zańnamasymen retteletin protsester sheńberinde zamanaýi tehnikalyq quraldardy paidalaný arqyly jáne aqparattyq qaýipsizdik salasyndaǵy ýákiletti organmen yntymaqtastyqta júzege asyrylady», - deidi Ulttyq statistika biýrosynyń basshysy.
