Ádep jónindegi keńeste Batys Qazaqstan oblysy Báiterek aýdany Mahambet aýyldyq okrýginiń ákimi Beibit Amanǵalievtiń halyqqa qatysty aitqan sózine bailanysty tártiptik is qaraldy. Memlekettik qyzmet salasyndaǵy baqylaý basqarmasynyń bas mamany Gúlsim Dáýletovanyń aitýynsha, ákimniń sózi Instagram-da tarap ketken. Ákim jýrnalistke suhbat bergen kezde "Halyqty nesine tyńdaisyńdar? Halyq qazir mal bolyp ketken ǵoi" degen eken, - dep habarlaidy Massaget.kz portaly "Moi GOROD" saityna silteme jasap.
"Osylaisha, Amanǵaliev aýyl turǵyndaryn óz sózimen qorlap, memlekettik qyzmetshilerdiń ar-namys kodeksin buzdy. Báiterek aýdany ákimi apparatynyń qyzmettik sipattamasyna sáikes Beibit Amanǵalievtiń tártiptik jazasy joq, ol - bilikti maman jáne bilikti basshy. Sonymen qatar, aýyl turǵyndarynan hattar kelip tústi, onda olar óz ákimderi týraly jaqsy aitady", - dedi memlekettik qyzmet salasyndaǵy baqylaý basqarmasynyń bas mamany Gúlsim Dáýletova.
Aýyl ákimi de nege bulai aitqanyn túsindirýge tyrysqan. Onyń sózinshe, oqiǵa byltyr 7 jeltoqsanda bolǵan. Sol kúni Mahambet aýylynyń mańynda úlken júk kóligi elektrjelisine soǵylyp, saldarynan aýyl bir kún boiy jaryqsyz qalǵan.
"Sol kúni qatty aiaz boldy. Eki saǵattan keiin Gorbýnov pen Pavlov aýyldarynda gaz óship qalǵany týraly habar keldi. Ol aýyldar eshkimniń balansynda joq, únemi sý qubyry qatyp qalady. Aýylǵa baryp, turǵyndarmen kezdesip, jaǵdaidy túsindirýge tyrystym. Gaz birden qosylmady, barlyq qurylym jumys istedi, ózim de táýlik boiy uiyqtamadym. Turǵyndar jýrnalisterdi shaqyrǵan eken, olar kelip túrli suraq qoia bastady. Ózim stress jaǵdaiynda turdym, sebebi sáýirde anam men baýyrymnan aiyrylyp qaldym. Árine, ol meniń jeke sharýam ekenin túsinemin, jumysqa qatysy bolmaýy kerek, biraq rasynda qiyn jaǵdaida turdym", - dep túsindirdi aýyl ákimi.
Beibit Amanǵaliev rasynda solai aitqanyn, alaida qazir ókinetinin jáne turǵyndardy jinap, keshirim suraǵanyn aitty.
"Men halyqty malǵa teńegim kelmedi, turǵyndar sabyrsyz bolyp ketkenin aitqym kelgen. Sebebi apattyń saldaryn joiý ońai jumys emes. Sharshap ta qaldym, jasym 59-da, sol kúni aiazda kóp júrdim. Biraq halyqty, aýyl turǵyndarynyń kóńiline qaiaý túsirgim kelmedi", - dep túsindirdi Beibit Amanǵaliev.
