Reseidegi túrki halyqtarynyń ómiri jaily film túsirmek bolǵan Stambýl ýniversitetiniń magistranty, Qazaqstan azamaty Nazgúl Kenjetai Reseidiń Hakasiia aimaǵynda júr. 2021 jyl.
Túrkiianyń memlekettik Anadolu agenttigi Reseidiń Hakasiia aimaǵynda 16 jeltoqsanda GZT basylymynyń redaktorlary Nazgúl Kenjetai men Emin Karachak ustalǵanyn habarlady. Olar Reseidegi túrki halyqtarynyń ómiri jaily derekti film túsirgen. Kenjetai men Karachakty ekstremizmmen kúres bóliminiń qyzmetkerleri ustaǵan: jýrnalisterdiń zattary kámpeskelenip, túsirgen barlyq materialdary joiylǵan. Qazir ekeýi Abakandaǵy ýaqytsha qamaý ornynda otyr, jaqyn arada deportatsiialanady, dep jazady Azattyq radiosy.
Kenjetaidyń sózine qaraǵanda, ony Krasnoiarsk arqyly Qazaqstanǵa, áriptesin Túrkiiaǵa jiberedi. Alaida eki tilshiniń sózine qaraǵanda, bilik olardyń deportatsiiasyn keshiktirip jatyr. Jýrnalisterdiń aitýynsha, Abakandaǵy kamera ishi sýyq, izoliatorda jyly sý joq, olar kúnine eki ret qana taza aýaǵa shyǵa alady. Al olardyń telefondary únemi baqylaýda. Kamerada sonymen birge videobaqylaý da joq.
Nazgúl Kenjetai – Túrkiiada turatyn Qazaqstan azamaty, Túrik ýniversitetiniń jýrnalistika fakýltetin támamdaǵan. Qazaqstanda Taiaý Shyǵystaǵy qaqtyǵys oryndarynan fotoreportaj toptamasyn ázirlegeni úshin "Qazaqstannyń jańa júz esimi" ulttyq jobasyna engen. Ol Hakasiiaǵa barǵanǵa deiin Emin Karachakpen birge Iakýtiia, Býriatiia jáne Altaidaǵy túrki halyqtarynyń ómirinen birneshe baǵdarlama túsirgen.
Nazgúl Kenjetai men Emin Karachak
"Sibir.Realii" saitynyń jazýynsha, 17 jeltoqsanda Abakan qalalyq soty Kenjetai men Karachakty Reseige kirý erejesin eki ret buzdy dep tanyǵan. Ishki ister ministrliginiń málimetinshe, blogerler aqparat quraldaryna video túsirgenmen Hakasiiada akkreditatsiiasyz jumys istegen: sol úshin olarǵa 5 myń rýbl kóleminde aiyppul salynǵan. Buǵan deiin olar Iakýtiiada da dál osylaisha aiyptalyp, aiyppul alǵan.
Túriktiń memlekettik agenttigi Resei aqparat quraldary "Kenjetai men Karachak tyńshylyqpen ainalysyp, Reseige qarsy úgit-nasihat júrgizdi, túrki halyqtary Reseide nashar jaǵdaida ómir súrip jatyr dep kórsetkisi keledi jáne islamdy taratyp júr" dep negizsiz aiyptap, aqparat taratqan. Alaida Hakasiiadaǵy túrkiler "túrik jýrnalisteriniń qiyn jaǵdaida qamaýda otyrǵanyn kórip, olarǵa tamaq pen sý aparyp jatyr" dep jazdy.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
