Aqtóbelik qoǵam belsendisi Baqyt Janshaeva sheshimi kezek kúttirmeitin máselelerdi, halyqty tolǵandyrǵan suraqtardy atqarýshy organǵa jetkizip otyrady. Ol bul qoǵamdyq jumystyń tiimdi tustaryn aityp berdi, dep habarlaidy QazAqparat.
Aqparat jáne qoǵamdyq damý ministrliginiń bastamasymen qurylǵan qoǵamdyq baqylaýdyń Aqtóbe oblysy boiynsha úilestirýshisi Baqyt Janshaeva óńir turǵyndaryna jaqsy tanys. Jýrnalist ári qoǵam belsendisi sońǵy jyldary kópbalaly analar máselesin jii kóterip júr. Koronavirýs infektsiiasy beleń alyp, karantin sharasy kúsheigen kezde sanitariia talabyn saqtaý, dezinfektsiia jumystaryn júrgizýdi baqylap, áleýmettik tólem máselelerin ótkir kóterdi. Oblys ákimi janynan qurylǵan monitoring toppen kóshelerdi aralap, saýda oryndarynyń jumysyn qadaǵalady.
«Mobildi top quramynda avtobýstardyń jumysyn baqylap, saiabaqtarda monitoring júrgizdik. Tek qadaǵalaý ǵana emes, túsindirýmen de ainalystyq. Sońǵy aialdamaǵa baryp, dezinfektsiiany qalai jasaitynyn qaradyq. Jolaýshylarǵa maska taǵýdyń mańyzyn qaita-qaita eske salyp otyrýǵa týra keledi. Saiabaqta da dál sondai jaǵdai. «Taza aýada otyrmyz, taǵý mindetti emes» dep ýáj aitatyndar bar. Sanitariia talaby boiynsha bir otbasydan bolmasa, saiabaqta betperdesin taǵyp, araqashyqtyqty saqtaýlary kerek. Munyń bári ýaqyt talaby», - dedi Baqyt Janshaeva.
Qoǵam belsendisi demalys kúnderi de baqylaý jumysyn jalǵastyrady. «Ana men bala» saiabaǵyna baryp, onvń qashirgi jai-kúiine qatysty máselelerdi qaita kóterdi.
«Biz karantin kezinde ǵana emes, buryn da óńirdegi isterdiń olqy tustaryn jii kóterip júmiz. Máselen, saiabaqqa barǵanda oiyn alańdaryndaǵy qoqys, ondaǵy shamdardyń synyp, tozyǵy jetkenin, attraktsiondardyń jaramsyz kúige túskenin sýretke túsirip, atqarýshy organǵa joldadym. Bul qoǵamdyq oryn, únemi kútimdi qajet etedi. Sondyqtan qala ákimdigi únemi nazarda ustap, qalpyna keltirýi tiis. Kógaldandyrý jumystary da aqsap tur», - dedi qoǵam belsendisi.
Aqparat jáne qoǵamdyq damý ministrliginiń bastamasymen qurylǵan qoǵamdyq baqylaýǵa úlken júk artyldy. Bul qoǵam men atqarýshy organ arasyndaǵy bailanysty tyǵaita túsetin tetik.
«Zańsyzdyqty kórip, úndemei qalýǵa bolmaidy. Máselen, dárihanada baǵa kóterildi. Sebebin bilýge árkimniń quqyǵy bar. Dúkenderde sanitariia talabyn saqtalmasa, tutynýshy quqyǵynyń buzylǵany. Tek oblys ortalyǵynda emes, aýdandarda da bul jumys jolǵa qoiylǵan. Foto, video materialdar jiberedi. Maǵan túsken aqparattardy jaýapty organdarǵa jiberemin», - dedi Baqyt Janshaeva.
