Foto: Akorda.kz
Qasym-Jomart Toqaevtyń tóraǵalyǵymen Qaýipsizdik Keńesiniń otyrysy ótti. Jiynda halyq arasyndaǵy qumar oiynǵa táýeldilik máseleleri qarastyryldy, - dep habarlaidy "Ult aqparat" Aqordanyń baspasóz qyzmetine silteme jasap.
"Sońǵy jyldary elimizde qumar oiynǵa táýeldilik beleń alyp barady. Keibir otbasylar úshin bul úlken qasiretke ainaldy", – dedi Prezident.
Prezident osy jaman ádetke, ásirese, jastar áýes ekenine nazar aýdaryp, memlekettik organdarǵa azamattardyń jekelegen sanattary úshin qumar oiyndarǵa qatysty shekteýlerdi kúsheitýdi tapsyrdy.
"Lýdomaniiaǵa qarsy kúreste tárbie isi men túsindirý jumystaryna erekshe mán berilýge tiis", – dedi Prezident.
Osyǵan bailanysty Memleket basshysy salalyq ministrlikterge naqty mindetter júktedi.
Sonymen qatar Qasym-Jomart Toqaev qumar oiynǵa táýeldi azamattardyń qatysy bar qylmystar kóbeigenine quqyq qorǵaý organdarynyń nazaryn aýdaryp, aldyn alý jumystaryn júrgizip, zańdylyq pen quqyqtyq tártipti qamtamasyz etý úshin sharalar qabyldaý jóninde tapsyrma berdi.
Prezident elimizde lýdomaniianyń beleń alýyna qarsy baǵyttalǵan áleýmettik daǵdylardy qalyptastyrýda qoǵamnyń, din qyzmetkerleriniń jáne buqaralyq aqparat quraldarynyń atqaratyn róli erekshe ekenin atap ótti.
Sondai-aq Memleket basshysy oiyn biznesi salasyndaǵy qarjylyq jáne basqa da quqyq buzýshylyqtardyń aldyn alý jumystaryn jandandyrý qajet ekenine nazar aýdardy.
– Barlyq qarjy qozǵalysyn qadaǵalap, zańǵa qaishy áreket anyqtalǵan jaǵdaida tiisti sharalar qabyldaý mańyzdy, – dedi Prezident.
Jiyn barysynda Úkimet músheleri men birqatar memlekettik organ basshylary baiandama jasady.
