Densaýlyq saqtaý ministri Aleksei Tsoi eldegi epidemiologiialyq jaǵdai týraly aqparat berdi. Aitýynsha, birqatar óńirde infektsiialyq statsionarlar patsientterge tolyp qalǵan, dep habarlaidy Sputnik Qazaqstan.
"Búginde birqatar óńirde kovidtik statsionar naýqastarǵa tolyp qaldy. Densaýlyq saqtaý júiesine shamadan tys salmaq túsip otyr. Sonyń saldarynan halyq meditsinalyq kómekke der kezinde qol jetkize almaýy múmkin. Al bul infektsiianyń odan ári taralýyna, aýrýshańdyqqa jáne ólim-jitimniń kóbeiýine ákeledi", - dedi Tsoi brifingte.
Ministrdiń aitýynsha, 28 shildedegi jaǵdai boiynsha respýblikada infektsiialyq tósek-oryndardyń 53% (24 748 tósek) naýqastarǵa tolǵan, reanimatsiialyq tósek-oryndar – 43% (1 819 tósek).
Infektsiialyq jáne reanimatsiialyq tósek-oryndarǵa qajettilik Almaty, Shymkent qalalarynda, Aqtóbe, Túrkistan jáne Qyzylorda oblystarynda artqan.
"Eger byltyr táýligine 2 myń adamǵa deiin bolsa, biyl shildede bul úsh esege ósti (6 925 adam). Emdelip jatqan patsientter sany da eki esege ulǵaidy", dedi ministr.
Tsoi birqatar óńirde infektsiialyq jáne reanimatsiialyq tósek-oryndar tapshylyǵy bolýy múmkin ekenin eskertti. Olar Nur-Sultan, Shymkent qalalary men Aqtóbe, Aqmola jáne Qyzylorda oblystary.
Qazir Qazaqstanda 90 myńǵa jýyq adam aýyryp jatyr. Onyń ishinde 25 myńǵa jýyǵy statsionarlarda emdelip jatsa, 65 myńǵa jýyǵy ambýlatorlyq em qabyldaýda.
Tsoidyń málimdeýinshe, shildeniń basymen salystyrǵanda aýyr hálde jatqan naýqastar sany 2,1 ese , 709-dan 1500 adamǵa deiin kóbeidi.
Myńǵa tarta naýqas jasandy tynys aldyrtý apparatyna qosylǵan.
