«ArselorMittal Temirtaý» AQ bas direktory Paramjit Kalonnyń aitýynsha, búginde kásibi kenshilerdiń kóbi Reseige kóship jatyr. Sebebi ol jaqta taý-ken salasynda isteitin mamandar úshin zeinet jasyna erterek shyǵýǵa múmkindik bar, dep habarlaidy QazAqparat tilshisi.
«Iá, kásibi mamandar alys jáne jaqyn shet elderge kóship jatyr. Óitkeni basqa jerde áleýmettik jeńildikter kóp. Osynyń saldarynan Qazaqstan maman tapshylyǵy problemasyna tap bolyp otyr. Bizge de ońai emes. Máselen, Qazaqstanda zeinetke 63 jasta shyǵady. Al Reseide taý-ken jumysshylary 54-te zeinetker bola alady. Sol sebepti kásibi mamanǵa kórshi Reseige kóship bara salǵan tiimdi. Adamdar buny jaqsy biledi. Osyǵan bailanysty biz Qazaqstan úkimetine xat joldap, taý-ken salasynda isteitin jumysshylardyń zeinet jasyn kemitýdi usyndyq», - dedi Kalon búgin Astanada ótip jatqan VIII Halyqaralyq taý-ken metallýrgiia kongresinde.
Onyń aitýynsha, asa aýyr óndiristerde, ásirese, jerdiń astynda kómir qazyp júrgen jumysshylarǵa 25 jyldan keiin zeinetkerlikke shyǵýǵa múmkindik berý kerek.
«Sonda 20 jastaǵy kenshi 45 jasta zeinetkerlikke shyǵa alsa, ary qarai óz bilimin jetildirip, jumys istei alady. Árine, atalǵan máseleni jan-jaqty zerdelep, tiisti zańnamaǵa ózgeris engizý kerek. Degenmen, bir nárse anyq, osy sharany qolǵa almasaq, kásibi mamandardy ózimizde ustaý qiyn bolady», - dep atap kórsetti ArseloMittaldyń bas direktory.
