Foto: aikyn.kz / A.Ahmetqazy
Májilis depýtaty Baqytbek Smaǵul Kenesary hannyń bassúiegi men myltyǵy Máskeý murajaiynda ekenin málimdedi. Depýtat olardy Qazaqstanǵa qaitarý kerektigin aityp, Premer-ministr Álihan Smaiylovqa osy máselede qoldaý kórsetý týraly saýal joldady, dep habarlaidy "Ult aqparat".
«Han Kene az ýaqytqa bolsa da, barlyq úsh júzdi biriktirip, handyqty, iaǵni qazaqtyń memlekettiligin qalpyna keltire aldy. Kóptegen zertteýshi eldiń aýmaqtyq tutastyǵyn qalpyna keltirýdegi Kenesarynyń erekshe rólin atap ótti. Oǵan patsha ákimshiliginiń ókilderi de qurmetpen qarap, ony «Qazaq dalasynyń Mitridaty», «erjúrek batyr» dep ataǵan. Kenesary Qasymulynyń ulaǵatty ómiri, janqiiarlyq erligi, elge adal qyzmeti úlgisinde qazaq batyrlarynyń birneshe urpaǵy, XX ǵasyrdaǵy ult-azattyq qozǵalys kóshbasshylary tárbielendi», - dedi depýtat.
Onyń sózinshe, qazir Kenesary hannyń bas súiegi men myltyǵy Máskeýdegi etnografiialyq murajaida ýaqytsha saqtaýda tur.
«2021 jyly geografiialyq qoǵam uiymdastyryp, Qazaqstannan arnaiy barǵan komissiia jáne mamandar Uly hannyń bas súiegi men myltyǵyn sáikestendirý jumystarymen ainalysty. Tarihi, antropologiialyq, murajailyq jáne muraǵattyq zertteýler kesheniniń qorytyndysynda myltyqtyń hanǵa 100% tiesili ekeni, al bas súiek Kenesary hannyń bas súiegi ekeni (sáikestik 90%-dan joǵary) anyqtaldy», - dedi Baqytbek Smaǵul.
Osy oraida depýtat Kenesary hannyń bassúiegin elge qaitarýdy surady.
«Qurmetti Álihan Ashanuly, Kenesary hannyń týǵanyna 220 jyl jáne Uly hanymyz bastaǵan kóteriliske 185 jyl tolýyn, munyń ulttyq tarihtaǵy mańyzdy ornyn eskere otyryp, sonymen qatar Ádiletti Qazaqstanda tarihi ádildikti qalpyna keltirý maqsatynda Sizden Kenesary hannyń súiegi men myltyǵyn Reseiden Qazaqstanǵa qaitarý máselesinde qoldaý kórsetýińizdi suraimyn. Han súiegin Astanadaǵy Ulttyq panteonda jerleýdi, al myltyqty Ulttyq murajaiǵa tapsyrýdy usynamyn. Bul shara el rýhynyń asqaqtaýyna, otanshyldyqtyń kúsheiýine jáne el astanasyndaǵy týrizmniń damýyna yqpal eteri sózsiz», - dedi ol.
