QR Premer-Ministri Asqar Maminniń tóraǵalyǵymen ótken Úkimet otyrysynda 2021-2025 jyldarǵa arnalǵan geologiialyq barlaý memlekettik baǵdarlamasy tujyrymdamasynyń jobasy qaraldy, dep habarlaidy "Ult aqparat" primeminister.kz saityna silteme jasap.
Tujyrymdamany QR ekologiia, geologiia jáne tabiǵi resýrstar ministri M. Myrzaǵaliev tanystyrdy, Qazaqstan munaishylar-geologtar qoǵamynyń prezidenti B. Qýandyqov, «Shell Qazaqstan» kompaniiasynyń kommertsiialyq máseleler jónindegi bas menedjeri E. Merfi, «Qazaqmys Barlaý» bas direktory Ǵ. Nurjanov, Shyǵys Qazaqstan oblysynyń ákimi D. Ahmetov, Qaraǵandy oblysynyń ákimi J. Qasymbek, QR Premer-Ministriniń orynbasary R. Skliar QR-da geologiialyq barlaýdy damytý tásilderi men máseleniń ózektiligi týraly baiandama jasady.
Ázirlenip jatqan 2021-2025 jyldarǵa arnalǵan geologiialyq barlaý memlekettik baǵdarlamasy Qazaqstan aýmaǵynyń geologiialyq zerdelenýin qamtamasyz etýge, mineraldyq-shikizat bazasyn tolyqtyrýǵa (paidaly qazbalar qorlarynyń ósimi), jer qoinaýyn geologiialyq zertteýdi ǵylymi-zertteýshilik qamtamasyz etýge, avtomattandyrý men tsifrlandyrýǵa, infraqurylymdy damytýǵa jáne geologiialyq salany kadrlyq qamtamasyz etýge, sondai-aq halyqtyń áleýmettik-ekonomikalyq ál-aýqatyn qamtamasyz etýge baǵyttalatyn bolady.
Memlekettik baǵdarlamany júzege asyrý úshin memlekettik biýdjetten 200 mlrd teńgege jýyq qarajat bólý, sondai-aq shamamen 800 mlrd teńge jeke investitsiialar tartý kózdelip otyr.
Memlekettik baǵdarlamany oryndaý alańdardy geologiialyq jete zertteýdi 94,5%-dan 100%-ǵa deiin, tereńdik, geologiialyq-mineragendik kartaǵa túsirýdi 25,8%-dan 37%-ǵa deiin arttyrýǵa, qatty paidaly qazbalardyń 50-ge jýyq perspektivaly alańyn anyqtaýǵa, shógindi alaptardyń geologiialyq zerdelenýin qamtýdy: igerilgenderdi – 60%-ǵa deiin, az zerttelgenderdi 10%-ǵa deiin ulǵaitýǵa múmkindik beredi.
Boljamdyq resýrstardyń ósýi kútilýde, onyń ishinde altyn – 200 tonna, mys – 5 mln tonna, polimetaldar – 5 mln tonna, ýran – 50 myń tonna, kómirsýtekter – 700 mln tonna. Geologiialyq barlaý salasy qyzmetkerleriniń sany 190 myńnan 250 myń adamǵa deiin artady.
«QR Tuńǵysh Prezidenti – Elbasy Nursultan Ábishuly Nazarbaev ekonomikanyń dástúrli óndirýshi salalarynyń tiimdiligin arttyrý jáne Qazaqstandy geologiialyq barlaýdyń álemdik naryǵyna shyǵarý jóninde mindet qoidy. Memleket basshysy Qasym-Jomart Kemeluly Toqaev Úkimetke geologiialyq barlaýdyń memlekettik baǵdarlamasyn ázirleýdi tapsyrdy. Munai-gaz jáne taý-ken metallýrgiia sektorlaryn turaqty shikizat bazasymen qamtamasyz etý qajet. Qazirgi bar ken oryndary birtindep sarqylýda. Sonymen birge qazirgi ýaqytta Qazaqstan aýmaǵynyń zerttelý deńgeii 25%-dan sál ǵana asyp otyr», — dedi A. Mamin.
Premer-Ministr Geologiialyq barlaýdyń memlekettik baǵdarlamasyn tiimdi iske asyrý salynǵan 1 teńgege 4 teńgege deiin qosymsha jeke investitsiialardy tartýǵa múmkindik beretinin atap ótti. Elimizdiń, ásirese monoqalalardyń mańynda mineraldyq-shikizat bazasyn kóbeitý ekonomikaǵa oń áserin tigizip, ónerkásip salalaryn damytý úshin naqty negiz bolady.
«Ken oryndaryn ashqan kezde jańa óndiristik keshender qurylady, bul 6 trln teńgege deiin investitsiia tartýǵa jáne qosymsha 20 myń jumys ornyn ashýǵa múmkindik beredi», — dep atap ótti A. Mamin.
Premer-Ministr geologiialyq barlaý jumystaryn júrgizý kezinde geofizikalyq zertteýler men Jerdi qashyqtan zondtaýdyń jańa ádisterin qoldaný qajet ekenin atap ótti.
Premer Ekologiia, geologiia jáne tabiǵi resýrstar ministrligine osy jyldyń 31 mamyryna deiin Memlekettik baǵdarlamanyń jobasyn Úkimetke engizýdi tapsyrdy.
